දකුණු දිග කැනඩාවේ රොකී කඳු වැටිය පාමුල කැල්ගරි නගරය අපූරු භූමි නිර්මාණයකට හිමිකම් කියයි. කඳු පාමුල මිටියාවත වසරින් අඩක් පමණ ශීත දේශගුණයකින් යුක්ත වන අතර සිසිරයේ දැඩි හිම පතනයක් පවතී. වසන්තයත් සමගම නව දලු ලා පිබිදෙන නගරය අමුතුම සුන්දරත්වයක් උසුලයි . එහි කැල්ගරි විශ්වවිද්‍යාලය සහ එය පිහිටි භුමිය නගරයේ සිත් ඇද ගන්නා තැනකි. වඩා වැදගත් වන්නේ එය ලොව රාජ්‍ය විශ්වවිද්‍යාල අතර අද්විතීය නාමයක් ඉසිලීමය. එතරම් දිගු ඉතිහාසයක් නැති සරසවිය ජාත්‍යන්තරයේ ඉහළට ගෙනගිය මිනිසා සොයා යන්නට කැනඩාවේදී මට සිත් විය. ඒ අන් කරුණක් නිසා නොව ඔහු ශ්‍රී ලාංකිකයෙකු වීම හේතුවෙනි. කැල්ගරි විශ්වවිද්‍යාලයේ අන්තර්ජාතික කටයුතු අංශයේ සහකාර උප කුලපති මහාචාර්ය ජානක රුවන්පුර තෘප්තිමත් සිනහවකින් මා පිළිගත්තේ ඔහුගේ කාර්යාල කාමරයේදීය. එහිදී මා සිත්ගත් දසුනක් වූයේ කැල්ගරි විශ්වවිද්‍යාලය සහ ඔහු පසුගිය වසර කිහිපයේ දිනා ගත් ජයග්‍රහණ, සම්මාන සහ පදක්කම්ය.
ඔබ මහාචාර්යවරයකු දක්වා ආ ගමන් මඟ ඇරඹෙන්නේ කොතැනින්ද?
ඒ පළමු පියවර කොළඹ නාලන්දාවේ ප්‍රාථමික අංශයට හිමිවිය යුතුයි. කුඩා අවදියේ එහි ඇතුළත් වීමට ලැබීම මගේ භාග්‍යයක්. මා ලබාගත් විනය, දැනුම හා පෞරුෂය නාලන්දාවේ නිර්මාණයක්. ළමා කාලයේ කැපී පෙනෙන දස්කම් දක්වන්නට සමත් වුණේ නැතත් උසස් පෙළ මට්ටමට එන විට විෂය බාහිර ක්‍රියාකාරකම්වලින් මා ඉදිරියෙන්ම හිටියා. කොටින්ම විදුහලේ සියලුම සංගම්වල නිලතල දැරුවා. ඒ සියල්ල අතරින් නාලන්දාවේ බෞද්ධ සංගමයේ නායකත්වය දැරූ කාලය මට අමතක කරන්න බැහැ. මම නාට්‍ය සහ කලා සංගමයේ ලේකම් ලෙස අවුරුදු දෙකක මහඟු සේවයක් කළා.
ඔබ මහාචාර්යවරයෙක් නිසා උසස් පෙළ සමත් වූ ආකාරය පිළිබද දැනගැනීමට අපේ පාඨකයින් කැමති වේවි.
මට කුඩා කාලයේ වෛද්‍යවරයක් වෙන්න ආසාවක් තිබුණා. පසුව ඉංජිනේරුවෙක් වෙන්න මං ආසා කළා. උසස් පෙළ ගණිත අංශයේ ඉගෙනුම ලබන විට මා පාසලේ සිටින දක්ෂම ශිෂ්‍යයන් කීප දෙනාගෙන් කෙනෙක්. හැබැයි මට සී තුනයි එස් එකක් වගේ ප්‍රතිඵලයක් තමයි ලැබුණෙ. ඉංජිනේරුවෙක් වෙන්න, ඉංජිනේරු පීඨයට යන්න එය ප්‍රමාණවත් ලකුණු ප්‍රමාණයක් වුණේ නෑ. තවත් වසරක් ඉගෙන ගෙන එයට උත්සාහ කරනවද යන්න පිළිබද සිතමින් සිටින විට මගේ පියා ඉතා වැදගත් තීරණයක් ගැනීමට මට උදව් කළා. දැනට ලැබී ඇති අංශයෙන් ඉදිරියට යන්නැයි ඔහු කීවා. මම ප්‍රමාණ සමීක්ෂකයෙකු එහෙම නැතිනම් quantity surveyor කෙනෙකු වීමට ඉගෙන ගත්තා. මේ තීරණය මගේ ජීවිතයේ විශාල වෙනසක් ඇති කළ අඩිතාලමක් වුණා. පසුව මොරටුව විශ්වවිද්‍යාලයේම සහාය කථිකාචාර්යවරයකු ලෙස පත් වුණා. ඊටත් පසුව Fulbright ශිෂ්‍යත්වයක් දිනා ඇමෙරිකාවේ පශ්චාත් උපාධියට ඉගෙන ගැනීමට පැමිණියා. ඒ ගමන් ම‍‍‍ෙඟ් අවසානය තමයි මහාචාර්යවරයකු වීම. අරමුණක් සාක්ෂාත් කරගැනීමට ඇත්තේ එකම මාර්ගයක් පමණක් නොවේ. ඒ සඳහා විවිධ මාවත් තිබෙනවා. අවශ්‍ය වන්නේ ඒවා හඳුනා ගැනීමයි. කෙසේ වෙතත්, ඉගෙනීම පිළිබඳ අවධානය යොමු කිරීමට මා දිරිමත් කිරීම ගැන මගේ දෙමවුපියන්ට ගෞරව කළ යුතුය. ඔවුන් හැම දෙයක්ම මට ලබා දුන්නා පවුලේ එකම දරුවා ලෙස. මගේ පියා වසර 30 කට පෙර මා විශ්ව විද්‍යාල සිසුවකුව සිටියදී මිය ගියා. මවත් මිය ගිහින්.
කැනැඩාවට පැමිණි ආකාරය සහ කැනඩාවේ ජීවිතය පිළිබද ඔබ තෘප්තිමත් ද?
ඇමෙරිකාවේ පශ්චාද් උපාධිය හදාරන කොට කැනඩාවේ ඇල්බර්ටා විශ්වවිද්‍යාලයෙන් ආරාධනාවක් කළා. ඇමෙරිකාවේ ඉතා උණුසුම් ප්‍රදේශයක ජීවත් වන මට ඔවුන් අධික සීතලකින් යුතු පළාතක පිහිටි ඇල්බර්ටා විශ්වවිද්‍යාලයය බාර අරගෙන කටයුතු කරන්න පුළුවන් ද කියා ඇසුවා. මං ඇහුවා ඒ ප්‍රදේශයේ මිනිස්සු ඉන්නවද කියලා. පසුව මං කැනඩාවට සංක්‍රමණය වුණා. ඊටත් පසුව 2001, කැල්ගරි විශ්වවිද්‍යාලයයේ සහාය මහාචාර්යවරයකු ලෙස පත් වුණා. මෙම විශ්වවිද්‍යාලය මට හොඳින් සැලකුවා. 2007 දී මම ව්‍යාපෘති කළමනාකරණය පිළිබඳ කැනඩා පර්යේෂණ මහාචාර්යවරයකු (Canada Research Chair) ලෙස පත් කළා. දැන් අන්තර්ජාතික කටයුතු පිළිබද සහාය උපකුලපති. ඊට අමතරව මම දැනට ඉංජිනේරු මහාචාර්යවරයකු, කැනඩාවේ වරලත් ඉංජිනේරුවරයකු සහ වරලත් ප්‍රමාණ සමීක්ෂකවරයෙකුද වෙනවා.
කැනඩාවේ ජීවිතයට ඔබ ඇලුම් කරන්නේ ඇයි?
මගේ නිල කාලයේදී කැල්ගරි විශ්වවිද්‍යාලයය ඉහළට ගෙන ඒමට හැකිවීම බොහෝ තෘප්තියට පත් විය හැකි කාරණාවක්. මම විශ්වවිද්‍යාලය අන්තර්ජාතික කටයුතු බාර ගන්න කොට තිබුණු තත්වයට වඩා හැම අතින්ම ඉහළට ගේන්න මට පුළුවන් වුණා. 2017 දි උතුරු ඇමෙරිකාවේ රාජ්‍ය විශ්වවිද්‍යාල අතර අන්තර්ජාතික කටයුතු පිළිබද ප්‍රථම ස්ථානය අපේ විශ්වවිද්‍යාලයට හිමි වුණා. එදින මගේ දෑසට කඳුළක් ගෙනා දවසක්.
මෙහි වැඩ කරන පුද්ගලයාට වැඩ කරන්න සහාය හැම පැත්තෙන්ම ලැබෙනවා. කිසිවෙක්වත් ඊර්ෂ්‍යා කරන්නේ හෝ බාධා කරන්නේ හෝ නෑ. තමන් නීතියට වැඩ කරනවා නම් හැමෝම උදව් කරනවා. හොඳ සැලැස්මක් තියෙනවා නම් අනෙක් අය ඊට සහයෝගය දෙනවා. විශේෂයෙන්ම මගේ කාර්ය මණ්ඩලය නොසිටින්න අපට මේ ඉලක්කයට ළඟා වෙන්න බෑ. කිසිම කෙනකු මා විදේශිකයෙකු ලෙස සැලකුවේ නෑ. හැම දෙනාම එකම කණ්ඩායමක් ලෙස ක්‍රියා කළා. ඒ ගුණයට මම බෙහෙවින්ම ප්‍රිය කරනවා.
ලංකාවෙ අපේ දරුවන්ට ඔබේ හැකියාවෙන් ගත හැකි ප්‍රයෝජන මොනවාද?
ශ්‍රී ලංකා විශ්වවිද්‍යාල උපාධිධාරීන් දෙවැනි තැනට පත් නොවන බව මා අත්දැකීමෙන් තරයේ විශ්වාස කරනවා. ලංකාවේ විශ්වවිද්‍යාල පද්ධතියට පුළුවන් අපිත් සමඟ සම්බන්ධ වෙන්න. මා යටතේ ශ්‍රී ලංකාවේ පශ්චාද් උපාධිධාරී සිසුන් 15 දෙනෙකු (ශිෂ්‍යත්ව ඇතුළුව) උපාධි ලබා ගත්තා. විශේෂයෙන්ම ලංකාවේ පර්යේෂණ සඳහා විදේශගත වෙන්න කැමැත්තෙන් සිටින දක්ෂ දරුවන්ට මේ විශ්වවිද්‍යාලයේ අවස්ථාව ලබා දෙන්න අපි සූදානම්. ඒ සඳහා උසස් අධ්‍යාපන අමාත්‍යංශය හරහා ක්‍රියාත්මක විය යුතුයි. ඔවුන් ඉල්ලීමක් කළ යුතුයි. අපි සූදානමින් ඉන්නවා ලංකාවට අත දෙන්න. ශ්‍රී ලංකාවේ විශ්වවිද්‍යාලවල කීර්තිනාමය ලෝක මට්ටමේ පර්යේෂණ විශ්වවිද්‍යාල ලෙස වැඩිදියුණු කිරීමට මා ඉතාම කැමැත්තෙන් උදව් කිරීමට ලොකු උනන්දුවකින් සිටිනවා.
මීට පෙරත් අප බොහෝ රටවල් සමඟ සහයෝගිතා හුවමාරු වැඩ සටහන් සාර්ථකව නිම කර තිබෙනවා. විශේෂයෙන්ම ලංකාවේ දක්ෂ සිසුන්ට තම ජීවිතය හැඩ ගස්වා ගැනීම සඳහා අප බොහෝ අවස්ථාවන් ලබා දී තිබෙනව. අපට කළ හැකි පමණින් අපේ රටේ මිනිසුන්ට සේවය කිරීම අප සියලු දෙනාගේ යුතුකමක් ලෙස ශ්‍රී ලාංකිකයෙකු වශයෙන් මා විශ්වාස කරනවා.
ඔබට අපේ දරුවන්ට දෙන්න තියෙන අවවාදය කුමක්ද?
ශ්‍රී ලංකාවේ තරුණ දරුවන්ට තිබෙන ප්‍රධාන ගැටලුවක් තමයි තමන් යායුතු මඟ පිළිබඳව අවබෝධයක් නැති කම. ඒ ගැටලුව නිරාකරණය කර ගන්න නම් හොඳ අධ්‍යනයක් සහිත සැලැස්මක් අවශ්‍යයි. ඒ නිසා අනාගතය සැලසුම් කරන්න. ඊළඟ අවුරුදු පහ, දහය මං මොකද කරන්නෙ කියල සැලසුම් කරන්න. දැන් ඉඳලම ඒකට සැලැස්මක් හදන්න. කාලෙන් කාලෙට ඒ සැලැස්ම තත්වය අනුව වෙනස් කරන්න. තමන්ගෙ සැලැස්ම ඔළුවෙ තියාගෙන හැමවිටම විශ්වාසයෙන් වැඩ කරන්න.
දියුණු රටවල ළමයින්ට තරම් හොඳ මඟ පෙන්වීමක් අපේ තරුණ පරපුරට ඇතැයි ඔබ සිතනවද?
දැන් තරුණ පරපුරට අන්තර්ජාලයේ සහයෝගය ලබා ගන්න පුළුවන්. එහෙත් බොහෝ දෙනා තාමත් අන්තර්ජාලයෙන් නිසි ප්‍රයෝජන ගන්න බවක් පෙනෙන්නෙ නෑ. ඉගෙන ගන්නා දරුවෙකුට නිසි පරිදි මෙහෙයවනවා නම් අන්තර්ජාලයෙන් විශාල පිටිවහලක් ලබා ගන්න පුළුවන් .
ඔබේ පවුලේ තොරතුරු කොහොමද ?
මට ඉන්නේ එක පුතයි. මගේ බිරිය සේනානි හමුවන්නෙත් උසස් අධ්‍යාපනය හදාරන සමයේදී ලංකාවේදී. ඇය මගේ සාර්ථකත්වය සඳහා බෙහෙවින් කැප වුණා. විශේෂයෙන්ම මම පශ්චාද් උපාධි ශිෂ්‍යයෙක්ව සිටියදී ඇයට බොහෝ අභියෝග වලට මුහුණ දෙන්න සිදු වුණා. මගේ පුතා සෙනිරු බොහොම නිදහසේ හිතන කෙනෙක්. ඔහුට අනාගත බලාපොරොත්තු ගොන්නක් තියෙනවා. ඒවා ඉටුකර ගන්න පසුපස සිට උදව් කරන එක තමා අප කරන්නේ. මාර්ගය සොයා ගෙන යාමට ඔහුට නිදහස දීල තියෙන්නෙ. ලොවට ප්‍රයෝජනවත් හොඳ පුරවැසියකු වීම ඔහුගේ කැමැත්තයි. මූලික වශයෙන් දරුවාගේ විනය ගෙදරදී හැදුවට පසුව දෙමවුපියන්ට බිය වීමට කාරණාවක් නෑ. ඉන්පසු ඔහු නිදහසේ ගමන යන්න දන්නවා කියලයි මා හිතන්නේ.
කැනඩාවේ ඔබේ ජීවිතය කොහොමද?
කැනඩාව සංක්‍රමණිකයන් සමඟ බොහෝ කටයුතු කරන විශිෂ්ට රටක්. අන් අයට ගෞරවයෙන් සලකන මිනිසුන් සිටින ඉතා උසස් සදාචාරාත්මක සහ ගුණධර්මවලින් අනුන රටක්. කෙසේ වෙතත් අපට තනිකමක් දැනෙනවා. හුදෙකලාව දැනෙනවා. අපට කැනඩාවේ පවුලේ සාමාජිකයන් නෑ. අප කැනඩාවේ සුඛෝපභෝගී ජීවිතයක් ගත කරනවා කියා ශ්‍රී ලාංකිකයන් සිතිය හැකිය. යම් දුරකට අපට මෙහි ජීවත්වීම දුෂ්කරයි. ශීතල දේශගුණික තත්ත්වයන් තුළ ජීවත් වීම පහසු නැහැ. අපි හැම දෙයක්ම කරන්න ඕනෑ අන් අයගේ උපකාරයක් නොමැතිව. නමුත් කැනඩාව ඉතා නිත්‍යනුකූල රටක් ලෙස සෞඛ්‍ය, ප්‍රවාහන හා යටිතල පහසුකම් අතර ඉහළ ගුණාත්මක ප්‍රතිලාභ රැසක් ලබා දෙනවා. සැබැවින්ම මෙම ප්‍රතිලාභ උපයා ගැනීම සඳහා අපි අපේ ආදායමට සරිලන ලෙස ඉතා ඉහළ බදු ගෙවනවා. කැල්ගරි හි ශ්‍රී ලාංකික ප්‍රජාව බෞද්ධ විහාරස්ථාන පිහිටුවා තිබෙනවා. අපට කාලය තිබෙන විට අපි ශ්‍රී ලාංකික ප්‍රජාව සමඟ ඇසුරු කරනවා. අප රටේ සංගීතඥයන් අපගේ නගරය වෙත පැමිණ සංගීත සංදර්ශන ඉදිරිපත් කරනවා. පසුගිය අවුරුදු 24 තුළ අප කැනඩාව හා ඇමෙරිකා එක්සත් ජනපදයේ ජීවත් වූ නිසා අපි මේ ජීවන රටාව සඳහා අනුගත වෙලා ඉන්නේ.
තරුණ වියේ ප්‍රේමය ගැන ඔබගේ අදහස් මොනවාද? විශේෂයෙන්ම අධ්‍යාපනය ලබන කාලයේ?
ඉගෙන ගන්න කාලයේ මමත් ප්‍රේම කරල තියෙනවා. ඒ අතර අනිත් කටයුතුත් හොඳින් කළා. හැම දෙයක්ම සමබරව කරගැනීම තමයි දක්ෂකම කියල කියන්නෙ. එකිනෙකට වෙනස් ක්‍රියාකාරකම් රැසක් කරන්න පුළුවන් නම්, ඒ වගේම අවදානමක් දැරීමට හැකියාවක් තියෙනව නම් ඉන් තමයි පෞරුෂය ගොඩ නගන්නෙ. මම ඉතා ශුභවාදී පුද්ගලයෙක්. මම හැම විටම විවිධ ව්‍යාපෘති මෙහෙයවන පුද්ගලයෙක්. මම Impossible කියන වචනයට කැමති නැ. අප සදාචාරාත්මක හා වෘත්තීයමය ලෙස, අපට ඕනෑම දෙයක් කළ හැකියි. අවශ්‍ය වන්නේ දැක්ම සහ කැපවීමයි.
නාරද විජයසූරිය
