ශ්‍රී ලංකා ඡායාරූප මාධ්‍යවේදීන්ගේ සංගමය සිය වාර්ෂික සුහද හමුව පවත්වමින් තවත් සමාජ සද්කාර්යකටද යොමු විය. ඒ ආචාර්ය කොන්සි පෙරේරා මහත්මියගේ ජීව පදනම සහ මහරගම සඳරුවන් කරුණාතිලක මහතාගේ අනුග්‍රහය ඇතිව ඇල්පිටිය ප්‍රදේශයේ අසරණ පවුලකට පිහිට වෙමිනි.
ශ්‍රී ලංකා ඡායාරූප මාධ්‍යවේදීන් ගේ සංගමයේ වාර්ෂික සුහද හමුව පසුගිය දා කොළඹ සිනමන් ලේක් සයිඩ් හෝටලයේ දී පැවැත්වුණු අවස්ථාවේ ඒ අනුග්‍රහය සිදු කෙරිණි.
සිය සමාජ මෙහෙවර හඳුනාගත් ඡායාරූප මාධ්‍යවේදීන්ගේ සංගමය ඇල්පිටිය ප්‍රදේශයේ අසරණ පවුලක් සඳහා වියළි ආහාර, ඇඳුම් පැලඳුම් හා පාසල් උපකරණ ලබා දීමට ද මෙය අවස්ථාව කරගෙන තිබිණි.
“එක් සමාජ සේවකයකුට මුළු රටම නඩත්තු කරන්න බැරි වුවත් රටේම සිටින සමාජ සේවකයන් දිරි ගැන්විය හැකියි. ඒ මෙවන් අවස්ථා ඔවුන් වෙත ගෙන යෑමෙන්. මාගේ සමාජ සද්කාර බොහොමයක් තිබුණත්, මෙම ඡායාරූප මාධ්‍යවේදීන් ගේ සංගමයේ අවශ්‍යතාව වෙනුවෙන් මම ඉදිරිපත් වුණේ හරිම කැමැත්තකින්.
මේ පවුලට උදව් කිරීමේ අවශ්‍යතාව එම සංගමය වෙනුවෙන් එහි භාණ්ඩාගාරික සමන් ශ්‍රී වෙදගේ මහතා මාව මුණ ගැහිලා ප්‍රකාශ කළා. මම දෙවරක් නොහිතාම ඊට සහය පළ කළේ, ඇත්තටම මා වසර ගණනක් පුරා සිදු කරන සමාජ සද්කාර රාශිය අතර මෙය විශේෂ අවස්ථාවක් නිසයි.
මම හිතන්නේ මම මීට සම්බන්ධ වීමෙන් සමාජයට ආදර්ශයක් ලබා දුන්නා කියලා.“ කොන්සි පෙරේරා මහත්මිය එහිදී කීවාය.
ඡායාරූප මාධ්‍යවේදීන් ගේ සංගමයේ සද්කාරයයට බඳුන් වූ ලලී ස්මිත් මහත්මිය,
“මගේ ස්වාමි පුර්ෂයා අසනීප වී මාස කිහිපයක් ඇතුළත මිය ගියා. රෝහල් ගතව සිටි ඔහු බලන්න යද්දි සිදු වුණු රිය අනතුරකින් මගේ කකුලක් කැඩුණා. හදිසියේ සිදු වූ මේ දේවල් නිසා දරුවන් හතර දෙනා සමග බොහොම අසරණ වෙලා ඉන්නෙ. ඡායාරූප මාධ්‍යවේදීන් ගේ සංගමයේ මහත්තුරු මේ කටයුත්ත කළේ හරියටම මගේ ස්වාමි පුර්ෂයාගේ තුන් මාසේ දානය දවසේ. දානය ඉවර වුණාට පස්සේ අපිව වාහනයකින් කොළඹ එක්ක ගෙන ඇවිත් සිනමන් ලේක් සයිඩ් හෝටලයේ දී අපට වියළි ආහාර ද්‍රව්‍ය වගේම පාසල් උපකරණ ප්‍රදානය කළා.
ඡායාරූපය සරත් පීරිස් සහ සමන් ශ්‍රී වෙදගේ
