අපේ වෙහෙර විහාර රැක ගැනීම රජයෙන් කරනතුරු බලා නොසිට බෞද්ධයන් වශයෙන් අප ද එයට දායක විය යුතුයි. මහා සංඝරත්නයේ අනුශාසනා අනුව බොදු ජනතාවගේ දායකත්වය ඒ වෙනුවෙන් ලබා දෙන්නේ නම් ගමක් ගමක් පාසා ඇති පන්සල්වල අඩුපාඩු සම්පූර්ණ කළ හැකියි.
ආමිසය අත හැර ප්‍රතිපත්ති පූජාවට නැඹුරු වීමෙන් නිවන් පසක් කර ගන්නට සිතනා උදවිය අද බහුලය. එදා බුදුරජාණන් වහන්සේ වැඩ සිටි කාලයේ සම්බුදු පියාණන් වහන්සේගෙන් එක් බණ පදයක් ඇසීමෙන් පමණක්ම රහත් මාර්ග ඵලයට පත් වූ උතුමන් ගැන අපි අසා ඇත්තෙමු. ආමිස පූජාවෙන් ප්‍රතිපත්ති පූජාවට පියමං කරමින් සතර අපායෙන් මිදීම උදෙසා සෝවාන් මාර්ග ඵලය ඇතුළු මාර්ග ඵලයන් ලබා ගන්නා අයුරු පසක් කරදෙන සත්පුරුෂයකු ගැන තොරතුරකි මේ.
‘ගමයි - පන්සලයි, එළිය කළ මිණි පහන ඔබයි’යන උදාර සංකල්පය පෙරදැරි කරගෙන සද්කාර්යෙහි නිරතවන ඔහු පොතුහැර, අහුගොඩ, මහපිටිවත්ත පදිංචි ජානක සී. සේනාධිපති මහතා ය.
ඔහු මිනිසුන් අතර යහගුණ වඩමින් පුද්ගලයන්ට ආමිසයෙන් ශක්තිමත් වීම සඳහා දන් දීම හා අතහැරීම ප්‍රගුණ කිරීමට මඟ පෙන්වීම සිදු කරන්නේය. ඔහු රටපුරා විවිධ ප්‍රදේශවල චෛත්‍ය, අටවිසි බුදු කුටි, බුද්ධ මන්දිර, ධාතු මන්දිර, සංඝාවාස, වාහල්කඩ, ඝණ්ඨාර කුලුනු, රන් වැටවල්, බෝධි ප්‍රාකාර, හා දේවතා මන්දිර අටසියයකට අධිකව ඉදි කරවනු ලැබ බුදු සසුනට පූජා කිරීමට පියවර ගෙන තිබේ. විශේෂයෙන්ම දුෂ්කර පළාත්වල ආර්ථික වශයෙන් ශක්තිමත් නොමැති පන්සල්වල පමණක් නොව අහිංසක දුප්පත් දරුවන් ඉගෙන ගන්නා පාසල්වල ද යම් යම් ඉදිකිරීම් සඳහා ඒ මහතා අතහිත දෙන්නේය. සේනාධිපති මහතාගේ මූලිකත්වයෙන් මේ වනවිට ඉදිකරවනු ලැබ ඇති චෛත්‍ය සංඛ්‍යාව 300කට ආසන්නය. තුන්සිය වැනි චෛත්‍ය ඉදි කරන්නට මේ වෙද්දී මංගල ශිලා ප්‍රතිස්ථාපනය කර අවසන් ය. මේ ඉදි කිරීම් සඳහා පරිත්‍යාගශීලිහු ජානක මහතාගේ මඟ පෙන්වීම යටතේ ආමිස පූජාවට යොමු වී අතහැරීම ප්‍රගුණ කිරීමට පෙලඹී සිටිති. තම යැපීම සඳහා ප්‍රමාණවත් මුදලක් තබා ගෙන මසුරුකමින් තොරව වැය කර ඉදිකෙරෙන චෛත්‍ය වහන්සේ ගොඩ නැඟෙනු දැක අපමණ කුසල් රැස් කර ගැනීමට ඔවුහු යොමුව සිටිති.
අපේ පන්සල් රැක ගැනීමට නම් බුද්ධ පුත්‍රයන්ට සැලකීම අත්‍යවශ්‍ය ගුණාංගයකි. එසේ නම් ප්‍රතිපත්ති පූජාව පමණක් ප්‍රමාණවත් කියන සංකල්පය සමාජගත කිරීමෙන් බැහැරව ආමිස පූජාවෙන් ප්‍රතිපත්ති පූජාවට යොමු වීම වඩාත් නිවැරදිය කියන සංකල්පය සමාජගත කළ යුතුය. ජානක මහතාගේ වෙහෙස ඒ වෙනුවෙනි. “අපේ වෙහෙර විහාර රැක ගැනීම රජයක් මගින්ම කරනතුරු බලා නොසිට බෞද්ධයන් වශයෙන් අප ද දායක විය යුතුයි. එවැනි පින්කම්වලදී භික්ෂු භික්ෂුණින්වහන්සේගේ ද අනුශාසනා ඇතිව සියලු බෞද්ධයන් එකතුව ගමක් ගමක් පාසා ඇති පන්සල්වල අඩුපාඩු සම්පූර්ණ කළ හැකියි. ශ්‍රම දායකත්වයෙන් මෙන්ම අමුද්‍රව්‍ය ලබාදීමෙන්ද පින්වතුන්ට ඒ සඳහා උදව් විය හැකියි” යන්න ජානක මහතාගේ අදහසයි. ඔහු මෙවැනි පින්කම් සිදු කරන්නේ වසර ගණනාවක සිටය. එවැනි පින්කම් තවදුරටත් ඉදිරියට ගෙන යමින් රටට ජාතියට අමිල වූ මෙහෙවරක් කර සම්බුද්ධ ශාසනය රැක ගන්නට එක් වන ලෙස ජානක සී. සේනාධිපති මහතා සැම දෙනාගෙන් ඉල්ලීමක් කරයි.
සන්ධ්‍යා කරුණාරත්න
