ධනයෙන් බලයෙන් ආඪ්‍ය රටවල කුණු බක්කි දුගී, දුබල රටවල්ය. ලොව කාර්මික රටවල ඉවත්වන කාර්මික අපද්‍රව්‍ය ද, වෙනත් සුන් බුන් ද, නැවු මඟින් විවිධ දූපත්වලට, දිළිඳු රටවලට දමා යන බවට ලොව දසතින් පුවත් ඇසෙයි. ශ්‍රී ලංකාව ඇත්තේ ජාත්‍යන්තර මුහුදු ගමන් මාර්ගයේ කුඩා දූපතක් වශයෙන් නිසා, ජාත්‍යන්තර කුණු ද අප දූපත වටා මුහුදු කලාපය වටා ඒකරාශි වීම ද අරුමයක් නොවේ. එහෙත් මේ ඇසෙන කතාව වෙනස්ය. අපේ උතුරු වෙරළ තීරයට මෑතක සිට කුණු ටොන් ගණන් එන්නට පටන්ගෙන තිබේ. කුණු එන බව කියන්නේ ඉන්දියාවෙනි.
 |
| අයි. එම්. ජී. සරත් චන්දනායක |
පසුගිය දිනවල කල්පිටිය පෙදෙසට මිය ගිය තල්මසුන් ගොඩට ගැසීම ද මන්නාරම වෙරළ තීරයට මියගිය මසුන් විශාල වශයෙන් ගොඩ ගැසීම ද කරතිවු තිරික්කපල්ලම වෙරළට මියගිය ඩොල්පින් මසුන් ගොඩ ගැසීම ද මේ අතර වාර්තා විය.
මසුන් මුහුදේ ඉපදීම මෙන්ම මිය යාම අරුමයක් නොවේ. කෝටි ප්‍රකෝටි සංඛ්‍යාත මසුන් අතරෙහි මසුන් 500-600 ක් මිය ගොස් වෙරළට ගොඩ ගැසීම ද අරුමයක් නොවේ. එහෙත් දැන් ධීවරයන් තිගැස්මකය.
තම මත්ස්‍ය සම්පත ඉන්දීය ධීවරයින් විසින් මංකොල්ල කෑමේ නිරතව සිටිය දී මෙපරිද්දෙන් මසුන් (කුඩා හා විසල්) මිය ගොස් ගොඩ ගැසීම ධීවරයිනට කනස්සල්ලට කරුණක් වෙයි. ඇතැම් ධීවරයන් ගොඩ ගැසූ තල්මසුන්ගේ බඩ පාදා ඇම්බර් ඇති දැයි බැලූ අවස්ථාවන් ද දක්නට තිබිණි. ඒ “පිනා චාන්ස්” එකක් හෝ ලැබේවි දැයි සිතමිනි.
ජයලලිතා මහ ඇමතිනිය මිය ගිය පසුව නම් ඇය සතුව තිබූ තුන්සීය ගාණනක් වූ බෝට්ටු තමිල්නාඩුවෙන් ශ්‍රී ලංකා මුහුදු කලාපය වෙත පැමිණීම තරමක් අඩු වී ඇති බව, කල්පිට - මන්නාරම් ධීවරයෝ පවසති. කරුණානිධිගේ අභාවය ද සමඟ ඔහු සතු ධීවර බෝට්ටු ද පැමිණීම අඩු වෙමින් පවතින බැව් ඔවුහු කියති. කෙසේ නමුත් පරණ පුරුද්දට ඉන්දීය ධීවර බෝට්ටු තවමත් පැමිණෙයි. නාවික හා පොලිසිවලට හසුවෙයි. හසු නොවු ඒවා ශ්‍රී ලාංකික මුහුදු මත්ස්‍ය සම්පත සුරාගෙන, බෝට්ටු පුරවාගෙන රහසේ ඉන්දීය ධීවරයෝ අපේ ධීවරයන්ගේ දැල් පන් ඉරා දමමින්, පො‍ළොවද සුරාගෙන කූඩැල්ලන් ඇතුළු කූණිස්සා දක්වා වූ මසුන් සියල්ල තම බෝට්ටුවල පුරවා පලා යති. අප ධීවරයන් මුලින් සිතුවේ මෙම ඉන්දියන් ධීවරයන් අප සීම‍ාවේ මසුන් ඩයිනමයිට් දමා, වෙනත් විෂ ඇම් දමා මරා දමද්දී විශාල පිරිසක් මිය ගොස් පාවෙන්නට ඇති බවයි. පසුව ඔවුන් පැවැසුවේ ඉන්දියාව දෙසින් අපද්‍රව්‍ය, කුණු කන්දල් ගසාගෙන අවුත් ඒ නිසා බලපෑමෙන් මසුන් මිය යන්නට ඇති බවයි. සැබැවින් ම ඔවුන් එසේ කීවද, එය විද්‍යාත්මකව ඔප්පු කිරීමක් කොට සනාථ කළ යුතු වෙයි.
මේ පිළිබඳව කිසියම් අ‍වබෝධයක් ලබා ගනු පිණිස පුත්තලම් දිස්ත්‍රික් සහකාර ධීවර අධ්‍යක්ෂ අයි.එම්.ජී. සරත් චන්දනායක මහතා මුණ ගැසී කරුණු විමසූ අවස්ථාවේ ඒ මහතා කියා සිටියේ එවැනි කුණු කන්දල් නිසා මසුන් මිය යාමක් පිළිබඳව කරුණු සොයා ගත නොහැකි වූ බවයි. තල්මසුන් සය (06) දෙනෙකු ද, ඩොල්පින් දෙදෙනකු (02) හා මසුන් රැසක් කරතිවු, තිරික්කපල්ලම සින්නපාඩුව, කල්පිටිය, දලුම, කන්ද කුලිය ප්‍රදේශවල මළකුණු ගොඩ ගසා තිබූ බව ද සඳහන් කළ ඒ මහතා මෙම කුණු කන්දල් පිළිබඳව පුද්ගලිකවම තමා ගොස් පරික්ෂා කළ බවත් වෙනදා මෙන්ම වෙරළට ගොඩ ගසන ද්‍රව්‍ය, අප ද්‍රව්‍ය, හිස් ප්ලාස්ටික් බෝතල්, දැල් ආම්පන්න ආදිය තිබූ බවත්, ඇතැම් ටින් කබල්, බෝතල්වල විදෙස් ලේබල් තිබූ බවත් ය.
ඔහු පැවැසුවේ පසුගිය කළ ඉන්දියාවේ පැවැති ගංවතුර නිසා මුහුදට වැටුණු පාවෙන ද්‍රව්‍ය මෙම කාලයේ ශ්‍රී ලංකාවේ පවතින වාරකන් සුළං කාලයේ ශ්‍රී ලංකාවේ පවතින වාරකන් සුළං හේතුවෙන් ශ්‍රී ලංකාව පැත්තට පාවෙවී ඒමට ඉඩ ඇති බවයි.
කෙසේ වෙතත් නාවුක හමුදාව යොදා මුහුදේ පරීක්ෂාවන් සිදු කළ ද සුවිශේෂි වූ යමක් දැකගත හෝ සොයා ගැනීමට නොහැකි බව ද ඔහු කීය. එසේ වුවද එම සත්ත්ව මළ කොටස් නාරා ආයතනය වෙත පරීක්ෂාවන් සඳහා යවා ඇති බවත් වාර්තා ලැබෙන තුරු යමක් පැවැසීම ප්‍රඥා ගෝචර නොවන බවත් ඔහු සඳහන් කළේය.
සමුද්‍ර ආරක්ෂක අධිකාරිය මඟින් මෙවන් ව්‍යසන, විපත් වෙනුවෙන් ක්‍රියාත්මක වන්නේය. මෙසේ තිබියදීත් ගිය සතියේදී ඉන්දීය ධීවරයන් අට දෙනෙකු සහිත ධීවර බෝට්ටුවක් තහනම් දැල් ආම්පන්න සහිතව අත්අඩංගුවට ගෙන අධිකරණයට ඉදිරිපත් කළේය.
පුත්තලම වන ජීවි සහකාර අධ්‍යක්ෂ චන්ද්‍රරත්න මහතා ප්‍රමුඛ වන ජීවි නිලධාරීන් පිරිසක් ද මෙම සතුන් මිය යෑම පිළිබඳව පරික්ෂා කර තිබිණි. ඔවුන් ද පැවැසුවේ මේ හේතුව නිශ්චිතව නිගමන තවමත් නොමැති බවයි.
මෙම පළපුරුදු නිලධාරීන් පවසන්නේ මහ මුහුද කෙතරම් සුවිසල් ද යත් මෙම කුණු කන්දල් ගණන් ගත නොහැකි තරමේ බවයි. සයුර ඇරඹුණ දා සිට විවිධ දෑ එයට එකතු වන බවත්, මිනිස් හා සත්ව, ශාඛ කොටස් ද, මිනිස් ක්‍රියාකාරකම් නිසා විවිධ කෘතීම දෑද මුහුදට නිරතුරුව එක්වන බවත් ඔවුහු පැහැදිලි කළහ.
සැබැවින් ම පරිසරය යනු මිනිසා, ගස් වැල්, සතුන්, අහස, පොළොව, මුහුද, ගාංගා වැනි දේය. මිනිසාගේ විවිධ ක්‍රියාකාරකම් නිසා සංවේදී පරිසරය සසල වනු ඇත. දුෂණය වනු ඇත. පරිසරයම අපායක් වනු ඇත. මුල දී අප පැවැසු සොඳුරු සිරිලක අඳුරු තැනක් වනු ඇත. සතුන්. මසුන් නිකරුණේ මිය යෑම පිළිබඳව අප සංවේදීව සොයා බැලිය යුතුමය. ඒ අපේ ද, දරුවනගේ ද හෙට දවස වෙනුවෙනි. ඉතින් ඒ මියගිය සතුන් අපට කියා දුන්නේ ඒ මහඟු පාඩමයි.
