වරෙක කවි කොළ නාටකයකි; අනතුරුව නර්තනයකි; ඒ අතරතුර ආරාධිත කවි කතාය. සභාවම රස ගුලාවකි. මේ ඉකුත් ජනවාරි 26 වනදා දෙහිවල එස් ද එස් ජයසිංහ ශ්‍රවණාගාරයේ දක්නට ලැබුණු දර්ශන පෙළකි. අගනුවර තරුණ කවි සමාජය හෙවත් අතකසයේ 85 වැනි සංවත්සරය එයට නිමිත්ත විය.
සහභාගී වූවන් සියල්ල සිටියේ එක පොදියටය. ඔවුන්ට වයස් තරාතිරමක් නොවීය. වැඩිහිටියන් තරුණයන් පමණක් නොව ළමයිද ඒ අතර වූහ. හිටිවන කවීහු වේදිකාවේ පෙළහර පෑහ. කවි රසිකයෝ ඇසිපිල්ලමක් නොගසා ඒ දෙස නෙත් අයාගෙන සිටියහ. අතකස 85 වැනි සංවත්සර උලෙළ ලාංකික සිංහල සාහිත්‍යට නව පෙරවදනක් එක් කරමින් රසවතුන් අමන්දානන්දයට පත් කළේය. කවිය කවියක්ම බව අපට පසක් කළේය.
අපේ කවිය, මෙරට සංස්කෘතිය පමණක් නොව අධ්‍යාපනය, ආගම සහ ජාතික චින්තනයද පෝෂණය කළ බව කීවේ උලෙළේ ප්‍රධාන අමුත්තා වූ කථානායක කරූ ජයසූරිය මහත්මාය. තමා කොළඹ ආනන්ද විද්‍යාලයේ සිප් සතර හදාරද්දී එස්. මහින්ද හිමියන්ගේ, කුමාරතුංග මුනිදාසයන්ගේ, පී.බී. අල්විස් පෙරේරාණන්ගේ කවිවලින් පෝෂණය වූ සැටි හෙතෙම මෙහිදී ආවර්ජනය කළේය. කොළඹ යුගයේ කවීන් වූ සාගර පලන්සූරිය, මහගම සේකර, මාකඳුරේ ගුණවර්ධන, මීමන ප්‍රේමතිලක, උපනන්ද බටුගෙදර, චිත්‍රානන්ද අබේසේකරගේ කවි රස වින්දනයන්ද කථානායකතුමා එහිදී සිහිපත් කළේය.
අගනුවර තරුණ කවි සමාජය, කවියෙන් ඈත් වන සමාජය යළි එයට යොමු කරගැනීම සඳහා දරන ප්‍රයත්නය අගනේය. අතකස 85 සංවත්සරයේ සුවිශේෂ අවස්ථා වූයේ කවිය වෙනුවෙන් හා එහි ප්‍රවර්ධනය වෙනුවෙන් විපුල සේවාවක් කළ අය විශේෂ සම්මානයට ලක් කිරීමය. කොහිලවත්තේ ඩැනියෙල් බොතේජු, සනත් පියසේන, නන්දසේන පලිහක්කාර, අජන්ත සෙනෙවිරත්ත, හෙක්ටර් බෙත්මගේ, මහාචාර්ය මුදියන්සේ දිසානායක, මහාචාර්ය මංගල සේනානායක, මාධ්‍යවේදීන් වන රමේෂ් උවයිස්, සුමුදු චතුරාණි ජයවර්ධන, වසන්ති නානායක්කාර, සමන් ලෙනින්, වජිර ජයවර්ධන යන මහත්ම මහත්මීන් එහීදී කිවිපති, කාව්‍යශූරී, කාව්‍ය ශක්ති සම්මානයෙන් පුද ලැබූහ.
අගනුවර තරුණ කවි සමාජය සෑම වසරකම මෙවැනි සංවත්සර උත්සවයක් පැවැත්වීම අගය කළ යුතුය. එයට අමතරව තිරය පියුපස සිටිමින් සුවිශේෂ මෙහෙවරක් කළ අය ඇගයීමද පැසසිය යුතුය. කලාකාමී ප්‍රකට කවියන් කිහිප දෙනකු එක් වී 1935 විහාර මහා දේවී උද්‍යානයේ තණපලසේ හිඳ එක්ව කළ සාකච්ඡාවක ප්‍රතිඵලයක් වශයෙන් ඇරඹුණු අගනුවර තරුණ කවි සමාජය වඩ-වඩාත් සවිමත්ව පෙරට යනු ඇතැයි සාහිත්‍ය රසකාමි සැමගේ පැතුමය.
