දැනට ශ්‍රී ලංකාවේ සංරක්ෂණය වී පවතින ලෙස ගෝණ බරු, මඩතවාළු කොට්ටියරාන්,රං කුරාන්, හේරත් බංඩා, රන් රුවන්, ඉලංකායම්, දේවරුද්දිරි, හැට පඳුරු, හොඬරවාළු, කුරුළු තුඩ, කහරමනා, බාල කහර මනා, මුරුංගක්කායම්, කළු බාල වී, හැටදා වී, කහවනු, කුරු වී, පිහාටු වී, සුදු හන්දිරන්, කහට වී, මර්ජුවානා, පච්ච පෙරුමාල්, ගිරුස්, මසුරන්, වක, රත් කුණ්ඩ, පොකුරු වී, රත් කඳ, සුරමනියම්, දම්පාට ගොඩ වී, පුවක් මල් වී, කොත්තමල්ලි, බාලසුරිය, රත්මානික්කම්, දුරු වී, සූදුරු , කිරි නාරං, දික් වී, පොක්කාලි, කළු මුරුංගා, මොල්ලිගොඩ, මුදලි වී, බොල්ලු, අල්ලෙයි පෙරුමාල්, දෙමළ කොටන්, වෙව්ලයි, මුප්පගන්, කළු හීනටි, සුදු හීනටි, බෙහෙත් හීනටි, ගොඩ හීනටි, තාවළු හීනටි, වන්නි හීනටි, ගම්බද හීනටි, රතු හීනටි, මාව, බාල මාවී, මාතර වී, මිටි මා වී, ගාලූ සුලයි, දූලයි, සූදුරු සම්බා, මුතු සම්බා, ලේකම් සම්බා, අලගු සම්බා, පොල දැල්, සුවඳැල් , හාතියැල්, රත් කැඳ ඇල්, රං තැඹිලි ඇල්, රත් දැල්, රත් සුවඳැල්, මුදු කිරි ඇල්, සුදු මඩයැල්, රත්නැල්, බටපොළ ඇල්, ඇල් වී, මස ඇල්, හා රත්කරයැල ආදී වී වර්ග පාරම්පරික බීජ හා ගොවි උරුමයන් සුරැකීමේ ව්‍යාපාරය විසින් හඳුන්වා දී තිබේ.
ඉහත සඳහන් කළ වී වර්ග කිහිපයක ගුණ
සුවඳැල්- ශරීරය වර්ධනය කරයි, කටහඬ මිහිරි කරවයි.බහීශ්‍රාවී ක්‍රියා මනා කොට පාලනය කරයි, දියවැඩියාව පාලනය කරයි.
කළු හීනටි- කාය ශක්තිය වර්ධනය කරයි,ශරීර ගත විෂ නැසීම සඳහා භාවිතා කර තිබේ.තව ද කැඩුම් බිඳුම් වෙදකමේ දී හා විෂ වෙදකම සඳහා භාවිත කර ඇත.
සුදු හීනටි- මෙම සහල් වර්ගයේ ප්‍රෝටීන් සහ යකඩ වැඩි ප්‍රතිශතයක් පවතී. ගොඩ හීනටි, දික් වී දියවැඩියාව, කොළෙස්ටරොල් වැඩි වීම, අධික රුධිර පීඩනය පාලනය කළ හැකි බව කාර්මික පර්යේෂණ ආයතනයේ පර්යේෂණවලින් අනාවරණය වී ඇත. ශරීර ශක්තිය වර්ධනය කර ගැනීමට ගුණදායක වේ.
මසුරන් - දියවැඩියාව, කොලෙස්ටරෝල්, අධික රුධිර පීඩනය හා පිළිකා සෛල පාලනය කළ හැකි බව කාර්මික පර්යේෂණ ආයතනය මඟින් සිදු කළ පර්යේෂණවලින් සනාථ වී ඇත.
මා වී- ශරීර ශක්තිය වර්ධනය කරන අතර ජනන හැකියාව වර්ධනය කරයි.
මඩතවාළු- දියවැඩියාව සඳහා ප්‍රතිකාර කිරීමට යොදා ගෙන ඇත.
රණ දැල් - සෙම් රෝග පාලනය වන අතර සෞඛ්‍යට ගුණ දෙන සහල් වර්ගයකි.විවිධ ආහාර සැකසිය හැකි අතර ඉතාම සැහැල්ලු පිටි ලබා ගත හැක.
පච්ච පෙරුමාල් - මෙම සහල්වල යකඩ සහ ප්‍රෝටීන් වැඩි ප්‍රතිශතයක් අන්තර්ගතව ඇත.
දහතල- පිළිකා සෛල නැසීමට හා මුත්‍ර රෝග සමනය කිරීම සඳහා යොදා ගෙන ඇත.
කුරුළු තුඩ - මුත්‍ර රෝග සමනය සඳහා යොදා ගෙන ඇති අතර ශරීර ශක්තිය වර්ධනය කරයි.
තව ද පච්ච පෙරුමාල්, දාගනගල, දේවරුද්දිරි, කළු බාල වී , රතු හීන වී ආදී වී වර්ගවල පවතින යකඩ ප්‍රමාණය වැඩි බැවින් ගර්භණී මව්වරුන්ට, කිරි දෙන මව්වරුන්ට, ළදරුවන්ට, හා නව යොවුන් වියේ යුවතියන්ට ද ඉහළ පෝෂණ ගුණයක් ලබා දෙන වී වර්ග ලෙස පෙන්වා දිය හැකි ය.
උපදෙස්- පාරම්පරික බීජ හා ගොවි උරුමයන් සුරැකීමේ ව්‍යාපාරය හා කාර්මික තාක්ෂණ ආයතනය විසිනි.
මදාරා මුදලිගේ
