මලවිගේ දෙවැනි ගීතය ‘දෙනෙත් සිත්තම්’
අද රසඳුන ගෙන එන ‘දෙනෙත් සිත්තම්’ ගීතය ගයන්නෙ සංජීව මලවිආරච්චි. ක්ෂේත්‍රයේ වැඩි දෙනෙකු නම් ඔහුව හඳුන්වන්නෙ මලවි නමින්. මලවිගෙ දෙවැනි ගීතය තමයි දෙනෙත් සිත්තම්. මලවි ක්ෂේත්‍රයට එන්නෙ ප්‍රසංග වේදිකා නිවේදකයකු ලෙසට. කලක් එහෙම කටයුතු කළ ඔහු පසුකාලීනව ගීත ගයන්නට යොමු වෙනවා. ඔය අතරතුරදියි මලවිට හිතෙන්නෙ තමන්ගේ ම ගීතයක් ගයන්න. ඔහුගේ පළමු ගීතය රචනා කළේ අනෝමා විජයවර්ධන. ඇය ටෙලිනාට්‍ය පිටපත් රචිකාවියක්. ඒ පද රචනයට සංගීතය මුසු කළේ ජෝර්ජ් සේනානායක. හේමලාල් ගීතදේවගෙ ශබ්දාගාරයේ පටිගත කළ එම ගීතය තැනුණේ බංගලිදේශ තනුවකට අනුවයි. ‘ආදරයේ මායා’ ලෙසට නම් කළ එම ගීතයෙන් පසුවයි ඔහු දෙනෙත් සිත්තම් ගීතය පටිගත කළේ.
එය කසුන් ප්‍රීමාල්ගේ පද රචනයක්. සංගීතය සඳරුවන් ජයසිංහගේ. හරි ක්‍රියේෂන් මඟින් දෙනෙත් සිත්තම් ගීතයේ මියුසික් වීඩියෝව නිමකොට තිබෙනවා. මලවි වර්තමානයෙහි පදිංචිව සිටින්නේ බංගලාදේශයේ. ඔහු එහි පෞද්ගලික ආයතනයක සේවය කරනවා. මේ වනවිට දෙනෙත් සිත්තම් අන්තර්ජාලය හරහා නරඹපු ප්‍රමාණය ලක්ෂ අටකට වඩා වැඩි බව මලවි පැවසුවා. ඒ වගේම තවත් නිර්මාණ කිහිපයක් ම තිළිණ කරන්නට ඔහු බලාපොරොත්තුවෙන් සිටිනවා.
දෙනෙත් සිත්තම්හි පදමාලාව
දෙනෙත් සිත්තම් පාට කරමින් ඔය උරහිසේ තැබූ
කඳුළු පැල්ලම් මකා දැමුවේ ඔය දෑතමයි පැතූ
එදා දුක් නැති කළේ සෙනෙහසින් ඉන්නදෝ
මේ තරම් පෙම් කළේ ඔබත් හැර යන්නදෝ
යළිත් රිද්දන්නදෝ
ඇයගෙන් ලැබූ දුක් වේදනා අමතකවෙලා
අලුතින් හීනෙ පෙම පිදුණේ ඔබගෙන් නිසා
කාටවත් දුන්නෙ නැති තරම් හිතේ ආදරය පුද කළා
මේ තරම් දුකක් හිමි වුණේ යළිත්
රැවටුණේ මං නිසා
මිතුරියක ලෙසින් මට ළ‍ංවෙලා පෙව්වත් වෙලා
කවදාකවත් නොලැබු තරම් පෙම් කළ නිසා
කාටවත් දුන්නු නැති තරම් හිතේ ආදරේ පුද කළා
මේතරම් දුකක් හිමිවුණේ යළිත් රැවටුණේ මං නිසා
