බේරුවල ප්‍රාදේශිය ලේකම් කොට්ඨාසයේ හල්කඳවිල උප නගරයට පොලිස් මුර පොළක අවශ්‍යතාව කලක සිටම පවතින්නකි. මේ වන විට හල්කඳවිල උප නගරය ආශ්‍රිතව ඉතා ශීඝ්‍ර ෙයන් මත් උවදුර, කොල්ලකෑම් ඇතුළු දූෂණයන් වර්ධනය වී ඇත.
තවද සුළු සුළු අපරාධවලද වර්ධනයක් පෙන්නුම් කෙරෙමින් පවතී. කිසියම් අපරාධයක් මර්දනය සඳහා පයාගල පොලිසියට සැලවී විමර්ශන සඳහා පැමිණෙන විට සියල්ල උඩුයටිකුරු වී හමාරය.
පසුගිය රජයන් සමයේ හල්කඳවිලට පොලිස් මුර පොළක් ලබාදීමට කටයුතු කළද ගොඩනැඟිල්ලක් සොයා ගැනීමට නොහැකි වීම මත අදාළ යෝජනාව යටපත් විය. හල්කඳවිලට පොලිස් මුරපොළක අවශ්‍යතාව සඳහන් කරමින් යෝජනාවක් බේරුවල ප්‍රා දේශීය සම්බන්ධීකරණ කමිටුවටද මේ වන විටත් ඉදිරිපත් වී ඇත. ‘පොලිස් මුරපොළක්‘ පිහිටුවීම සඳහා බේරුවල ප්‍රාදේශිය සභාවේ මාර්කට් ගොඩනැඟිල්ලේ පිහිටුවීමට අවශ්‍ය කටයුතු සම්පාදනය කළ හැක. ඒ සඳහා සොයා බැලීමක් කළ යුතුය. මේ සම්බන්ධයෙන් නීතිය, සාමය පිළිබඳ අමාත්‍ය සරත් වීරසේකර, පොලිස්පතිතුමාගේ සහ කළුතර පොලිස් අධිකාරිවරයාගේ විශේෂ අවධානය යොමු විය යුතුය.
