දකුණු පළාතේ මාතර දිස්ත්‍රික්කයේ ප්‍රධානතම නගරයක් ලෙස වැලිගම නගරය හැඳින්වේ. මාතර - කොළඹ ප්‍රධාන මාර්ගයේ වැලිගම නගරය පිහිටා තිබේ. වැලිගම ප්‍රධාන බස්රථ නැවතුම්පොළ දැනට වසර 13කට පමණ පෙර රුපියල් ලක්ෂ තිස්පහක වියදමින් සාදා නිමකර ඇත. මේ නිසා පොදු ජනතාවට ඇතිවූ සෙත අතිමහත්ය.
කොළඹ - මාතර ප්‍රධාන බස් මාර්ගයේ වැලිගම ප්‍රධාන බස්රථ නැවතුම්පොළ පිහිටා තිබේ. එම බස් නැවතුම්පොළ පසුකර මාතර, දික්වැල්ල, තංගල්ල, ඇඹිලිපිටිය, හම්බන්තොට, කතරගම, බදුල්ල, අම්පාර, මඩකළපුව, නුවරඑළිය සහ දෙහිඅත්තකණ්ඩිය දක්වා දිවෙන බස්රථ රැසක්ම ධාවනය වේ.
දිනපතා මාතර සහ දුර ගමන් සේවා පහසුව තකා වැලිගම බස් රථ නැවතුමට පැමිණෙන ජනතාව දසදහස් ගණනකි. එහෙත් වැලිගම බස්රථ නැවතුම්පොළේ එම මගීන්ගේ පහසුව සඳහා ස්ථානයක් වෙන්කර නොමැති වීම විශාල අඩුපාඩුවකි. එම නිසා මාතර හා දුර ගමන් යෑමට පැමිණෙන මගීන්ට බසයක් පැමිණෙන තෙක් බලා සිටීමට සිදුවී ඇත්තේ වැලිගම විවිධ සේවා සමූපකාර කාර්යාලය ඉදිරිපිට මහාමාර්ගය අසලයි.
එලෙස මගී පහසුකම් ලබා ගැනීමට පැමිණෙන ජනයා අව්වෙන් සහ වැස්සෙන් විඳින පීඩාව අපමණය.
ස්ථිර බස් නැවතුම්පොළක් වසර 13ක පමණ කාලයක සිට වැලිගම නගර මධ්‍ය යේ ඉදිකර තිබුණත් කලෙක සිට පවතින මෙම අඩුපාඩුව පිළිබඳව මේ දක්වා කිසිදු වගකිවයුතු බලධරියකුගේ අවධානය යොමු වී නොමැත. එම නිසා දැන්වත් නගර බලධාරින්ගේ සහ අදාළ වගකිවයුතු බලධාරින්ගේ අවධානය මේ පිළිබඳව නොපමාව යොමුකොට වැලිගම බස්රථ නැවතුම්පොළෙහි ඉඩක් වෙන්කර දිය යුතු බව සඳහන් කරමි.
