ගාල්ල දිස්ත්‍රික්කයේ, ගාල්ල අගනගරය හැරුණු විට ප්‍රධාන උප නගරයක් ලෙස අම්බලන්ගොඩ නගරය සඳහන් කළ හැකිය. දෙස් විදෙස් සංචාරකයින්ගේ ආකර්ෂණයට මෙන්ම විවිධ කලා ශිල්පීන්ගේ තෝතැන්නක් වශයෙන්ද සඳහන් කළ හැකි මෙම නගරය අද ගැටලු රැසකට මුහුණ දී සිටී.
ප්‍රධාන මාර්ග පද්ධතිය පුළුල් නොවීම, පොදු රඟහලක් හෝ සම්මන්ත්‍රණ ශාලාවක් නොතිබීම, නවීන පහසුකම් සහිත තානායම් ගොඩනැඟිල්ලක් නොතිබීම, සුදුසු පොදු රථ ගාලක් නොතිබීම ආදි ගැටලු රැසකි.
දශක ගණනාවක සිටම නගර සභාවේ බලයට පත්වූ සෑම පාලකයකුම ඔවුන්ගේ අභිමතාර්ථ ඉටුකර ගැනීමට උත්සාහ ගත්තා මිස පොදු ගැටලුවලට ස්ථිර විසඳුම් ලබා දුන්නාදැයි ප්‍රශ්නාර්ථයකි. බලයට පත්වූ සෑම නගර සභා පාලකයකුම සිදුකර ඇත්තේ නගරයේ පවත්නා ගැටලු පිළිබඳව සැලසුම් සකස් කරමින්, වාදවිවාද කරමින් කාලයත් මුදලත් කාබාසිනියා කර දැමීමක් මිස ගැටලුවලට ස්ථිරසාර විසඳුම් ලබා දීමක් නොවේ.
අම්බලන්ගොඩ නගරයේ සංවර්ධනය සැලැසුම් කරගනිමින් මීට දශක පහකට පමණ පෙර එවකට බලයේ සිටි පාලකයින් විසින් ‘හල්වතුර නගර සංවර්ධන යෝජනා ක්‍රමය‘ යටතේ ප්‍ර දේශවාසීන් සතුව තිබූ ඉඩම් විශාල ප්‍රමාණයක් අම්බලන්ගොඩ ප්‍රාදේශිය ලේකම් කාර්යාලය හරහා නගර සභාවට පවරා ගනු ලැබීය. එහෙත් එම ඉඩම් සඳහා මෙතෙක් වන්දි මුදල් ගෙවීමක් හෝ අඩුම තරමින් නගරයේ සංවර්ධනයට එම ඉඩම් යොදාගත් බවක් හෝ තවමත් අපට දක්නට නොමැත.
බොහෝ කලක් පොදු රැස්වීම් ශාලාවක් මෙන්ම රඟහලක් වශයෙන්ද පාවිච්චියට ගන්නා ලද්දේ නගර ශාලාවේ බිම්මහලයි. එම බිම් මහල වර්තමානයේ නගර සභා පරිපාලන කටයුතු සඳහා වෙන්කරගෙන ඇත. ඒ නගර සභා ගොඩනැඟිල්ලේ නවීකරණ කටයුතු හේතුවෙනි.
එසේම දිනපතා නගරයට ඇදී එන රථවාහන ප්‍රමාණයද ඉතා විශාලය. එම රථවාහන නතර කර තැබීමට සුදුසු පොදු ස්ථානයක්ද නොමැත. පෞද්ගලික ව්‍යාපාරික ස්ථාන කිහිපයක ඇති රථගාල් හැරුණු විට පොදු රථ ගාලකට ඇත්තේ සමූපකාර මන්දිරය පිටුපස ඇති රථගාලය. එයද සියලුම වාහන නතර කර තැබීමටද ප්‍රමාණවත් නැත. එබැවින් විශාල වාහන ප්‍රමාණයක් දිනපතාම පාහේ ගාල් කර ඇත්තේ මහ වීදියේය.
ගාල්ල කොළඹ ප්‍රධාන මාර්ගයත්, මහ වීදියත් ඉතාම පටු මාර්ගය. නගරයට දිනපතා පැමිණෙන දහස් සංඛ්‍යාත මගීන්ට පා ගමනින් යාමටද ඉඩකඩ ප්‍රමාණවත් නොවේ. දීර්ඝ කාලයක් පුරා මාර්ග පද්ධති පුළුල් කිරීමටත්, විකල්ප මාර්ග ඉදි කිරීමටත්, ගුවන් පාලම් යෙදීමටත් බලයේ සිටි සෑම පාලකයෙක්ම පම්පෝරි ගැසුවද මේ වන තුරුත් ඒ කිසිවක් ඉටුවී නොමැත.
කොපමණ ආර්ථික අපහසුකම් තිබුණද වත්මන් රජය ග්‍රාමීය යටිතල පහසුකම් නැංවීමට මෙවර අයවැය මඟින් ප්‍රතිපාදන වෙන්කර ඇති බව පසුගියදා අපට අසන්නට ලැබිණි. එසේනම් වත්මන් පාලක පක්ෂය මේ පිළිබඳව උනන්දුවක් දක්වා නගරයේ සංවර්ධනයට බාධාවක්ව ඇති මෙම ගැටලුවලට විසඳුම් ලබා දෙනු ඇතැයි අපගේ විශ්වාසයයි.
