ගත­ ව­ඩන - විස නසන බල ­ව­ඩන කොස්

කොස්වල පෝෂණ ගුණ 38 ක් ඇත. ලෙඩ රෝග 35 පමණ මෙම කොස් හොඳය. කොස් වලින් සාම්ප්‍රදායික තාක්ෂණය හා නවීන තාක්ෂණය මඟින් කෑම වර්ග 200 කට අධික ගණනක් සකස් කර ගත හැකිය. මේ අනුව උදේට කන පාන්පිටි වලින් සෑදූ ආහාර වෙනුවට කොස් ආශ්‍රිත ආහාර ජනප්‍රිය කළ හොත් අපේ රටින් පිට රටට යන විශාල විදේශ විනිමය ප්‍රමාණයක් ද රට තුළම රඳවා ගත හැකිය.

ඉදිරියට එන්නේ කොස් වාරයයි. එසේ වුවත් ගම්බද කොස් ගස් යට කොස් ඉදී කුණුවී යනු ඕනෑතරම් දැකගත හැකිය. අපි කොස් එසේ ඉදී කුණුවී යන්න ඉඩදී චූන් පාන් කාරයාගෙන් කිසිම ගුණයක් නැති තිරිඟුවල කිසිම ගුණයක් නැතිම කොටසින් සෑදූ පාන් පිටි ආශ්‍රිත ආහාර මිලදී ගෙන අනුභව කරන්නෙමු.

පාන්පිටි ආහාරවලින් සිදුවන්නේ බඩ පිරීම පමණි. කිසිම ගුණයක් නැති නමුත් ඒ පාන් පිටි මිශ්‍රිත ආහාර වෙනුවට කොස් ආශ්‍රිත ආහාර කෑ‍වොත් රසවත් ගුණවත් ආහාරයක් අනුභව කොට වසරකට රුපියල් කෝටි 5000 ක් පමණ මෙරට ඉතිරිකර ගැනීමට ද හැකි බව කෘෂි ආර්ථික විද්‍යාඥයෝ පෙන්වා දෙති.

අද පාන් පිටි මිල නිතරම ඉහළ ය යි. 2001 දෙසැම්බර් 27 වැනිදා රුපියල් 11 ක්වූ පාන් ගෙඩියක මිල අද රුපියල් 55 - 60 අතර වේ. නමුත් කොස්වල මිල එතරම් වැඩි වී නැත. ගමේ ගොඩේ ගෙවල්වලින් කොස් ගෙඩියක් නොමිලේ වුවද ලබා ගත හැකිය.

මිල කෙතරම් වැඩි වුවත් පාන් ආහාරයට ගැනීමට සමහරු පෙලඹෙති. එය අද ඇබ්බැහි වීමකි. නමුත් මෙම පාන් වලින් සිදු කෙරෙන්නේ බඩගින්න නිවා දැමීම පමණක් බව නම් කිව යුතුය. තවත් විධියකට කිව්වොත් මෙම පාන් වලින් ශරීරයට ලැබෙන පෝෂ්‍ය ගුණය ඉතා අඩුය. පෝෂණ ‍විද්‍යාඥයින් පවසන පරිදි පාන් වල වැඩිපුරම ඇත්තේ පිෂ්ඨ යයි. මේද හා ඛනිජ ලවණ මෙහි අල්ප වශයෙන් තිබුණත් මේ පාන් දිගටම කෑවොත් දියවැඩියාව වැනි රෝග ඇති වීමටද හේතුවන බව පෝෂණ විද්‍යාඥයින්ගේ අදහසයි.

මේ අනුව බලන විට අද පාන් වෙනුවට විකල්පයක් අවශ්‍ය වී තිබේ. එය මිල අඩු දෙයක් විය යුතු අතර පෝෂ්‍යදායී අතින්ද ඉහළ මට්ටමක තිබිය යුතුයි. අද තිබෙන තත්වය අනුව අතටත් පහසු බඩටත් සුදුසු එකම විකල්පය කොස් ය. නැතහොත් හෙරළි ය.

කොස්වල පෝෂණ ගුණ 38 ක් ඇත. ලෙඩ රෝග 35 පමණ මෙම කොස් හොඳය. කොස් වලින් සාම්ප්‍රදායික තාක්ෂණය හා නවීන තාක්ෂණය මඟින් කෑම වර්ග 200 කට අධික ගණනක් සකස් කර ගත හැකිය. මේ අනුව උදේට කන පාන්පිටි වලින් සෑදූ ආහාර වෙනුවට කොස් ආශ්‍රිත ආහාර ජනප්‍රිය කළ හොත් අපේ රටින් පිට රටට යන විශාල විදේශ විනිමය ප්‍රමාණයක් ද රට තුළම රඳවා ගත හැකිය.

කොස්වල ගුණ

මේ අයුරින් කොස් ජනප්‍රිය කළ යුත්තේ ඇයි ද? අපි මුලින්ම සොයා බලමු කොස් අද අපේ රටේ ජනප්‍රිය කර වීමට ප්‍රධානම සාධකය විය යුත‍්තේ කොස්වල පෝෂණ ගුණය යි. කොස් පිළිබඳව පර්යේෂණ රාශියක් කළ පේරාදෙණිය විශ්ව විද්‍යාලයේ භෝගවිද්‍යා අංශයේ මහාචාර්ය එච්.එම්.පී. ගුණසේන මහතා පවසන පරිදි කොස් මදුළු වල කාබෝහයිඩ්‍රේට් 18.9% ක් ද කොස් ඇට වල කාබෝහයි‍ඩ්‍රේට් 34.47% ක්ද අඩංගු වේ. කොස් මදුළු ග්රෑම් 100 ක ශක්තිය කැලරි 98 ශක්තියක් තිබෙන අතර කොස් ඇට ග්රෑම් 100 ක කැලරි 181 ක ශක්තියක් තිබේ.

මීට අමතරව කොස්වල ප්‍රෝටීන් යකඩ පොටෑසියම් කැල්සියම් අයඩින් මේද හා පොස්පරස් යන පෝෂණ සංඝටක බහුලව තිබේ. විශේෂයෙන් කොස්වල ඇති මුළු විටමින් ප්‍රමාණය අන්තර්ජාතික ඒකක 540 කි. විටමින් ඒ විටමින් ඩී හා විටමින් බී වර්ගද මෙහිදී ප්‍රමුඛත්වයක් ගනී.

කොස්වල ගුණ

විද්‍යාඥයින්ගේ අලුත්ම මත අනුව කොස්වල ප්‍රමාණවත් මාංශජනක හා පිෂ්ඨ ප්‍රතිශතයක් අඩංගු නිසා මෙන්ම අතිරේක වෙනත් ඛනිජ ලවණ සුළු වශයෙන් පැවතීම නිසාත් විකල්ප ආහාරයක් ලෙස සුදුසුකම් ලබා ඇත.

ඉදුණු කොස් වල සීනි හා කැරොටින් අඩංගු ය. නමුත් සී විටමින් ඉතා සීමිතය. සාමාන්‍යයෙන් අනෙක් පලතුරු වලට සමාන ප්‍රමාණ වලින් ඉදුණු කොස්වල ප්‍රෝටීන් මේද කැල්සියම් පොස්පරස් හා යකඩ අන්තර්ගතය. මෙම පලතුරෙහි සීනි ෆ්රුක් ටොස් සියයට 1.74 ක් ද ග්ලූකෝස් සියයට 5.96 ක් ද සුක්රෝස් සියයට 6.9 ක් ද අන්තර්ගත බව ඉන්දියාවේ කළ අලුත්ම පර්යේෂණවලින් හෙළිවී තිබේ.

ඉදුණු කොස්වල කෙඳි මට්ටම ඉතා ඉහළය. මෙයින් ග්රෑම් 100 ක නියසීන් මිලිග්රෑම් 400 ක් ද ෆෝලික් අම්ලය මිලි ග්රෑම් 5.32 ක්ද ඔක්සිලික් අම්ලය මිලි ග්රෑම් 27 ක් ද අන්තර්ගත වේ.

ඇමයිනෝ අම්ල 11 ක් අඩංගුවේ.

අන්තර්ජාලයෙන් ලබාගත් අලුත්ම තොරතුරු අනුව කොස්වල අප ශරීරයට අත්‍යාවශ්‍ය ඇමයිනෝ අම්ල 11 ක් පමණ අන්තර්ගතය. ඒවා ප්‍රතිශතයක් ලෙස ගත්විට ආර්ජනින් 1.92, සිස්ටීන් 1.49, හිස්ටිඩින් 0.46, ලියුසින් 8.1, අයිසොලියුසීන් 7.2, ලයිසීන් 4.8, මෙතියොන් 1.44, පීනයිල් ඇලතින් 7.68, ත්‍රියොනින් 5.76, ට්‍රිප්ටොපෑන් හා වේලින් 8.8 ක් වේ.

කොස් ඇට වල ද ශරීරයට අත්‍යාවශ්‍ය ඇමයිනෝ අම්ල 8 ක් අඩංගුය. සිස්ටීන්, ලියුසින්, අයිසොලියුසීන්, මෙතියොනින්, ත්‍රියොනින්, ට්‍රිප්ටොපෑන් හා වේදලින් ඒ අතර වේ.

මහාචාර්ය එච්.බී.එම්. ගුණසේන ගේ පර්යේෂණ අනුව කොස් මදුළු ඉතාම හොඳින් මළ බද්ධය නසන ආහාරකි. මෙය චීනයේ සලකනු ලබන්නේ ගත සිසිල් කරන පෝෂ්‍යදායි සුවිශේෂී ආහාරයක් ලෙසයි.

ඖෂධීය ගුණය

පේරාදෙණිය විශ්ව විද්‍යාලයේ කෘෂි විද්‍යා පීඨයේ මහාචාර්ය ඒ.එස්.බී. රාජගුරු මහතා පෙන්වා දෙන පරිදි කොස් මලේ සිට වරකා මදුළු දක්වා මට්ටමේ ආහාරවල ඉහළ මට්ටමේ ඖෂධීය ගුණ තිබේ. වෛද්‍ය ඩැනිස්ටර් එල්. පෙරේරා කළ පර්යේෂණ අනුවත් ඒ බව මනාව පැහැදිලි වී තිබේ. කොස් මල් ලේ ගැලීම නැවැත්වීමට උපයෝගී කර ගනී.

කොස් ඇටවල විශාල ඖෂධීය ගුණයක් තිබේ. කොස් ඇට වල බිත්තරයක ගුණ ඇතැයි ගැමියෝ කියති. කෙසේ වෙතත් කොස් ඇටවල වාජීකාරක (ලිංගික ශක්තිය ඇතිකරන) බලයක් හා පිත්තශ්‍රාවයීක (සිරුරේ උෂ්ණ බව අඩුකරන) ගුණයක් තිබේ. කිරිදෙන මවු වරුන්ට කිරි එරවීමේ බලයක් ඇතිකරන කොස් මළ බද්ධයට ඉතා සුදුසුය.

අලුත්ම විද්‍යාත්මක පර්යේෂණ අනුව කොස් ඇටයේ ඇති කැල්සියම් පොස්පරස් වැනි ක්ෂුද්‍ර පෝෂකවල කිසියම් දැඩි බලකාරක ශක්තියක් ඇති බව පැහැදිලිව සොයාගෙන ඇත.

ඒ සමඟම බැදපු කොස් ඇටවල කාමෝද්දීපන ගුණයක් ඇති බව ද ඒ අනුව එවැනි බෙහෙත් වර්ග සෑදීමට කොස් ඇට යොදාගන්නා පර්යේෂණ ඉන්දියාවේ හා වෙනත් රටවල කෙරෙන බව ද අන්තර්ජාලයේ තොරතුරුවල දැක්වේ. කොස් ගසට රසායනික පෝර නොදමන අතර එය ස්වාභාවිකව වැඩෙයි. මේ අනුව කොස් වස විස වලින් තොර බව පැහැදිලිය. එහෙත් අප කන පාන් හදන පිටි කල්තබා ගැනීමට කොතරම් රසායනික ද්‍රව්‍ය ප්‍රමාණයක් භාවිත කරනවා ඇද්ද. ඒ පිළිබඳව අපි අවධානය යොමු කළ යුතු වෙමු.

විදේශ විනිමය

මේ අනුව බලන විට විදේශ විනිමය කෝටි ගණනක් වැය කොට මෙරටට ගෙන්වන පාන්පිටි වෙනුවට අපේ රටේ ඇති තරම් තිබෙන කොස් හා ඒ ආශ්‍රිත ආහාර ආහාරයට ගැනීම ජාති හිතෛෂී හා නීරෝගීමත් ජීවිතයක් අපේක්ෂා කරන සියලු ලාංකිකයන්ගේ යුතුකම බව දැන් ඉතා පැහැදිලිය ය . සෞඛ්‍ය සම්පන්න හා හිතෛෂී ජනතාවක් බිහිකිරීමත් පිටරටවලට ණය වී පිටරටින් ගෙන්වන අඩු පෝෂණ ගුණයක් සහිත පාන් පිටි වැනි දේවල් වලට වැට බැදීමක් කිරීම අවශ්‍ය බව ද මෙහි ලා සඳහන් කරමු. මෙහිදී කොස් පැළ වැවීමටත් කොස් ආශ්‍රිත නව නිපැයුම් රටට ලෝකයට හඳුන්වා දීමටත් ඒ සඳහා අවශ්‍ය පහසුකම් සැලසීමටත් රජයත් උනන්දු විය යුතුය. වාර්ෂිකව පාන්පිටි ගෙන්වීමට වැය වන රුපියල් කෝටි 4000 ක මුදලින් අඩු ගණනේ 3/1 ක් වත් ඉතිරි කිරීම මෙරට සංවර්ධනයට ඉතාමත් පිටුබලයකි. ඒ සඳහා පාන් පිටි භාවිතය අවම කළ යුතු බව ද කොස් වැනි දේශීය දේ නිතර නිතර ආහාරයට ගැනීම කළ යුතු බව ද අපි අවධාරණය කරමු.

මේ අනුව කොස් අපට කප් රුකකි. එමෙන්ම ගුණදායක රසදායක කෑම සෑදීමට හැකි ඖෂධයකි. ඉදිරි සති 3 - 4 වනවිට ඉහළ මට්ටමේ කොස් අස්වැන්නක් අපට ලැබෙන බව පැහැදිලිය. නමුත් ඒ කොස් ඵලදාවෙන් හරියට ඵල ප්‍රයෝජනයක් ගන්නට නිසි වැඩපිළිවෙළක් නැත. කොස් ආශ්‍රිත ආහාර වෙනුවට අප කන්නේ පාන් පිටි මිශ්‍ර කෑමයි. ඉන් ලෙඩ රෝග වැඩිවී ර‍ෙට් ආර්ථික ගැටලු ද ඇතිවී ඇත. මේ අනුව රටේ ජනතාව මෙන්ම අපේ රටද සමෘද්ධිමත් කිරීම පිණිස මේ ඉදිරි කොස් අස්වැන්නේ නිසි ප්‍රයෝජන ගැනීම පිණිස විධිමත් කාර්යක්ෂම වැඩපිළිවෙළක් සැකසීම රජයේ අදාළ අමාත්‍යාංශවල යුතුකමකි.

නිහාල් පී. අබේසිංහ