පසුගිය සතියෙන්...
වැසි ආවරණ තාක්ෂණයෙන් රබර් වගාවට ලැබෙන වාසි කිහිපයක් නම් වර්ෂාව නිසා වසරකට අහිමි වන කිරි කැපීමේ දින ගණන අවම වීම, රබර් වගාවේ ආදායම වර්ෂා කාලයේදීත් ස්ථාවර වීම, වාර්ෂික ආදායම ඉහළ යාම, කිරි කැපුම් ශිල්පීන්ගේ ආදායම 40% ක් පමණ වැඩි වීම, වැසි කාලයේදී කැපුම් ප්‍රදේශයට (කැපුම් කට්ටයට) සෑදෙන රෝග වළක්වා ගත හැකි වීම, හා වැසි දිනයන්හිදී කිරි කැපුම් ශිල්පීන්ගේ රැකියා ස්ථාවරත්වය ඇති වීම යනාදියයි.
රබර් වගාවට වර්ෂාවෙන් අස්වනු නෙළිමට සිදුවන බාධාවන් මඟ හරිමින් ඔවුන්ගේ ආදායම ඉහළ නංවා ගැනීමට මඟ පෙන්වීමක් ලෙස වැසි ආවරණ තාක්ෂණය පිළිබඳ මුලික හැඳින්වීම සලකා බලමු. වැසි ආවරණ සවි කිරීම වැසි කාලයට පෙර, අප්‍රියෙල් මස අවසන් වීමට පෙර සවි කර අවසන් විය යුතුය. ඒප්‍රන් හා කීසාන් ලෙස ප්‍රධාන ආකාර 2ක වැසි ආවරණ හඳුන්වා දී ඇත. වැසි ආවරණ සවි කිරීම සඳහා පොලිතීන් (මාන 300හා මාන 500) ගම් හා තාක්ෂණික පුහුණුව මුලික වශයෙන් අවශ්‍ය වේ. ඒප්‍රන් ආකාර වැසි ආවරණ සඳහා ඝනකම මාන 300 විනිවිද පෙනෙන 60 cmපළල පොලිතීන් අඟල් 11/2 දුරක් වන සේ රැල්ලක් තබා පොලිතීන් පටියේ දාරයට ඉතා කිට්ටුවෙන් මසා ගත යුතුය. ගස් 15-20 ට පොලිතින් 1 kg ප්‍රමාණවත් වේ. කීසාන් ආකාර වැසි ආවරණ සඳහා ඝනකම මාන 350 පොලිතීන් කැබලි 2 ක් එකතු කර සීල් කිරීමෙන් සාදා ගත හැක. ද්‍රව හා අර්ධ ඝන මිශ්‍රණය යනුවෙන් ගම් වර්ග 2 ක් හඳුන්වා දී ඇති අතර ඉන් එක් වර්ගයක් යොදාගෙන වැසි ආවරණ සවි කර ගත හැක. ගසේ කඳ වියළිව ඇති විට පමණක් වැසි ආවරණ සවි කළ යුතු අතර කිරි කැපුම් කට්ටයට සමාන්තරව එයට අඟල් 4-6 පමණ ඉහළින් අඟල් 2ක් පමණ පළලට ගසේ පොත්ත (කොළ පාට පොත්ත මතු නොවන සේ) යන්තමින්, කැපුම් කට්ට‍යේ දෙකෙළවර පොයි හා නෙත්ති කානු ඉක්මවා යන ලෙස අඟල් 6ක් පමණ දුරට සූරා දැමිය යුතුය. පොත්ත සූරා දින 2 කට පමණ පසුව එම ප්‍රදේශය රෙදි කැබැල්ලකින් හොඳින් පිස දමා වැසි ආවරණය වන සේ ආවරණය කැපුම් කට්ටයට සමාන්තරව සිටින සේ සවි කළ යුතුය.
ගම් සාදා ගැනීම, පොලිතීන් සකසා ගැනීම හා සවි කිරීමට අදාළ තාක්ෂණික පුහුණුව නොමිලේ ශ්‍රී ලංකා රබර් පර්යේෂණායතනයෙන් ලබා ගත හැකි අතර අදාළ පුහුණු වැඩසටහන් පිළිබඳව තොරතුරු ප්‍රදේශයේ රබර් ව්‍යාප්ති නිලධාරීන්ගෙන් තව දුරටත් ලබා ගත හැක. තවද, රබර් පර්යේෂණායතනයේ අනුමැතිය යටතේ නිපදවූ ගම් වෙළඳපොළෙන්ද ලබා ගත හැක. වැසි ආවරණවල ආයු කාලය මාස 13-15 පමණ වේ. මේ නිසා වසරක් පාසා වැසි ආවරණ සවි කළ යුතු අතර අවශ්‍ය විට දී නඩත්තු කටයුතු සිදු කිරීම තුළින් ජල කාන්දු වීම වළක්වා ගත හැක. මේ සඳහා ගම් ස්වල්පයක් ආලේප කිරීම සෑහේ. ඉහතින් දක්වන ලද ආකාරයට ක්‍රමානුකූලව වැසි ආවරණ සවි කිරීම තුළින් රබර් වගාවේ වැසි සමයේ කිරි කැපීමේ දින ගණන ඉහළ නංවා ගත හැකි වන අතර ඉන් රබර් වගා කරුවන්ගේ ආදායම ඉහළ නංවා ගත හැක.
පී.කේ.කේ. එස්.ගුණරත්න
උපදේශක නිලධාරී
රබර් පර්යේෂණ ආයතනය අගලවත්ත
