• ඔබ ගේය කාව්‍යකරණයට එන්නට කලින් කිවිඳියක්. කවි ලියන්නට මාර්ගය සැකසුණේ කෙසේද?
පුංචි කාලේ ඉඳල ම මට කවි ලියන්නට හැකියාව, වුවමනාව, ආශාව තිබුණා. ඉස්සර අපේ තාත්තා අපි වට කරගෙන විවිධ කවි තාලයට ගායනා කළා. ඔහු ගයන ඒ කවි අසන්නට කුඩා කාලයේ ඉඳන් ම මා බලවත් ආශාවක් දැක්වූවා. තාත්තා තාලයට ගායනා කරන කවි අසාගෙන සිටි මගේ කවි සිතත් කුඩා කාලයේ ඉඳන් ම අවදි වුණා කියලා හිතෙනවා. මම තැනින් තැන පිළිවෙලක් නැතිව කවි ලියද්දි තාත්තා මට විශාල පොතක් ගෙනත් දුන්නා, ඒ විසිරුණු කවි එක පොතකට එක්තැන් කර ගන්නට. අද ඒ පොත මගේ ළඟ නැතත් මම කිවිඳියක් ලෙස අත්පොත් තබන්නේ ඒ පදනම, ඒ මඟ පෙන්වීම ඔස්සේයි. සිතට නිදහසේ ගලා එන කවි සිතිවිලි කවි බවට පත්වී ඒ පොතේ ලියැවුණා.
අපේ පාසල් කාලයත් විචිත්‍ර කාලයක්. අපට සිංහල උගැන්වූ ගුරුවරිය වගේම ඉතා සොඳුරු ගුරුවරුන් ඇසුරු කිරීමේ අවස්ථාව අපට හිමි වුණා. ඒ කාලයේදීත් මම හොඳ කවි ලියන්නියක් ලෙස පාසලේ ගුරුවරුන් අතර හා යහළුවන් අතර ප්‍රසිද්ධ වී සිටියා. පසුකාලීන ව ගීත රචිකාවක ලෙස ආ මේ ගමනට කවියෙන් ලද ආභාසය අපමණයි. ඒ විතරක් නොවෙයි මම නිතර පොත් කියවන කෙනෙක්. ඒ කියැවීම මට පෝෂණයක් ලබා දුන්නා.
• කවිය හා ගීතය අතර ඇති වෙනස්කම් ඔබ හඳුනාගන්නේ කෙසේද?
මේ ගී බොහොමයක් මා අතින් ලියැවුණු කවි. කවියට වඩා ගීතයේ ලයාන්විත බව හා රිද්මයානුකූල බව වැඩියි. කවිය ඒක පුද්ගල නිර්මාණයක් වෙද්දි ගීතය සාමූහික ව්‍යායාමයක ඵලයක් වන්නේ ඒ නිසයි. මා ලියූ ගීත වලට වැඩිම වටිනාකමක් එක් වූයේ මගේ සැමියා, ටී. එම්. ජයරත්නයන්ගේ හඬින් ඒ බොහෝ ගී ගායනා වීම නිසයි. ඔහු මා ලියූ ගීත වරින්වර ගුවන් විදුලියේ සරල ගී වැඩසටහන් සඳහා ගායනා කළා. මා ලියන කවි ගී බවට පෙරළීමටත්, ඒවාට සුමියුරු තනු එක් කරන්නටත් අපූර්ව හැකියාවක් ඇත්තෙක් තමයි රෝහණ වීරසිංහයන්. මගේ හදවතේ මා ලියූ ගීතය වෙනුවෙන් තිබෙන හැඟීම ඒ ආකාරයෙන් ම, වඩාත් නිවැරදි ව කිවහොත් වඩාත් තීව්‍ර ව කියවා ගනිමින් ඊට මනා සාධාරණයක් ඉටු කරන්නෙක් හැටියට සංගීතවේදී ආචාර්ය රෝහණ වීරසිංහයන් හඳුන්වා දිය යුතුමයි.
සමහර අවස්ථාවල මගේ ගීතවල තිබෙන කාව්‍යමය ගතිය රිද්මයානුකූල බවකට පෙරළන්නට මේ සංයෝගය සමත් වෙනවා. අම්මා සඳකි ගීතයත්, සොඳුරු අතීතය ගීතයත් අදටත් එදා සේම එකසේ ජනප්‍රිය ව තිබෙන්නේ කාව්‍යමය ගුණය හා ගීතමය ගුණය එකට කැටි වූ නිසයි.
හෙළ සංගීතයේ රන් ලකුණක් වන ටී. එම්. ජයරත්නයන්ගේ, මගේ ආදරණීය සැමියාගේ හඬින් ඒවා ගායනා වීමත් ඒවාට නිසි වටිනාකම ලැබෙන්නට හේතු වුණා. ඒ පහන්කන්ද පාමුල සිටින මට එහි ආලෝකයේ පහස විඳින්නට ලැබීමත් මා ලද ජයග්‍රහණයක්. කිවිඳියක් වූ මා ගේය පද රචිකාවක් වන්නේ මේ සියල්ලේ එකතුවෙන්.
• කවි හෝ ගීත බිහි වන්නේ හදවත සනහන, කොනිතන අත්දැකීමක පහස ලබමින්. කෙසේද ගීත රචිකාවක ලෙස නිර්මාණකරණයේදී අත්දැකීම් ඔබට බලපෑම් කරන්නේ..
අපි ජීවත්වීමේදී අපට බොහෝ අත්දැකීම්වලට මුහුණ දීමට ලැබෙනවා. ඒ වගේම අනෙක් අයගේ අත්දැකීම් අපට බෙදාහදා ගැනීමට ලැබෙනවා. බොහෝ වෙලාවට මට ලියැවෙන ගී මගේ ම අත්දැකීම් නොවෙයි. මම මගේ ස්ත්‍රීත්වය, මාතෘත්වය ගැන බොහොම සතුටු වන කාන්තාවක්. මේ ලොව එළිය කරන්නේ, හැඩ කරන්නේ ගැහැනියයි. ගැහැනිය තමයි මවු පදවිය ලබන්නේ. අම්මා සඳකි... ගීතය ලියැවෙන්නේ ඒ මවු පදවියෙන් මා ලද ප්‍රහර්ෂයේ ඵලයක් ලෙසයි. අම්මාට විවරණ දෙන තාත්තාටත් අම්මාට හා සමානව ම ඒ ගරුත්වය දිය යුතුයි කියලයි මම අදහන්නේ. අන්න ඒ සිතිවිල්ල, අත්දැකීම තමයි ඒ ගීතයට පාදක වුණේ.
මම රැකියාවක් කරන කෙනෙක් නොවෙයි. මම මගේ සැමියාගේත්, දරුවන්ගේත් ලෝකයට ආලෝකයක් එක් කරන්නටයි මගේ දිවිය කැප කරන්නේ. බොහෝ කාන්තාවන් මා සමඟ කතාකර තමන්ගේ අත්දැකීම්, දුක් කම්කටොලු බෙදා ගන්නවා. ඒවාත් මගේ ජීවිතයට අත්දැකීම් හා සෙනෙහසක් එක් කරනවා. එ් වගේම මම බෞද්ධ දර්ශනය දැඩිව අධ්‍යයනය කරන, පිළිපදින කෙනෙක්. මේ ලෝකයේ ස්වරූපය මා දකින්නේ බෞද්ධ දර්ශනයට අනුකූලවයි. එය මට විශාල ශක්තියක්, සැනසුමක් ලබා දෙනවා.
• ඔබ ගීත විශාල සංඛ්‍යාවක් රචනා කර තිබුණත් ඒ ගී එක්කොට පොතක් ලෙස මේ නිකුත් වන්නේ පළමු වරටයි...
ඇත්තට ම මා ගී ලියූයේ ගී පොතක් ලෙස එළි දක්වනවා කියලා පුංචිවත් බලාපොරොත්තුවකින් නොවෙයි. වරින්වර මා ලියූ කවි හා ගී පද, අල්මාරි ලාච්චුවක දමා තිබුණා. අසනීපයෙන් පසු වූ පසුගිය අවදියේදී බොඳ වී, මැකී, දුර්වර්ණ වී ගිය මේ ගී පද මා නැවතත් ලාච්චුවෙන් එළියට ගෙන නැවත පිටපත් කිරීමට පටන් ගත්තා. මගේ සැමියාත් වරින් වර ගී පිටපත් කරමින් මට මේ සඳහා උපකාර කළා. මේ අතරතුරදී විශිෂ්ට ගේය පද රචකයකු වන සුනිල් සරත් පෙරේරා මහතා මගේ දුක සැප අහන්න කතා කළ වෙලාවක මම කිව්වා මේ කරමින් සිටින කාර්යය ගැන. එතුමා කිව්වා මේ ගී එක්කොට කෘතියක් කිරීමේ වැදගත්කම. සමුද්‍ර වෙත්තසිංහ සොයුරාත් මට නිතර මේ ගැන මතක් කළා. විජේසූරිය මහතා මා දිරි ගන්වා ප්‍රකාශනය බාර ගත්තා. බොහෝ දෙනකුගේ ඉල්ලීම හා කැපවීම මත තමයි මේ කෘතිය නිකුත් වන්නේ.
• ‘අම්මා සඳකි‘ ගී පොත මෙන්ම සංයුක්ත තැටිය එළි දක්වන අවස්ථාව විචිත්‍රවත් කරන්නට එන පිරිස ගැන සිහිපත් කළොත්...
‘අම්මා සඳකි‘ පොතත්, සංයුක්ත තැටියත් එළි දකින්නේ ලබන 22 වැනිදා ප.ව. 3.30 ට ශ්‍රී ලංකා පදනම් ආයතනයේ දී. මේ උලෙළේ මුලසුන හොබවන්නේ විශාරද නන්දා මාලිනිය විසින්. ප්‍රධාන දේශනය පවත්වනු ලබන්නේ ප්‍රවීණ ගේය පද රචක, කිවිවර රත්න ශ්‍රී විජේසිංහයන් විසින්. සිරිල් ගාමිණී පියතුමා, මහාචාර්ය කාලෝ ෆොන්සේකා, ප්‍රවීණ ගේය පද රචක සුනිල් සරත් පෙරේරා, මහාචාර්ය සුනිල් ආරියරත්න හා ආචාර්ය රෝහණ වීරසිංහ කෙටි දෙසුම් පැවැත්වීමට නියමිත යි. ටී. එම්. ජයරත්න, සමිතා එරන්දතී මුදුන්කොටුව, නෙලූ අධිකාරී, කපිල පූගල ආරච්චි, ඉසුරු ජයරත්න, අරෝෂ සමරදිවාකර, රවීන් කණිෂ්ක හා ඉසුක ගීනෙත් ගී ගායනයෙන් එක් වනවා. සංගීතය රවීන් කණිෂ්කගෙ සහෘදය ඇමතුම ප්‍රවීණ ගේය පද රචක බණ්ඩාර ඇහැළියගොඩ තමයි සිදු කරන්නේ.
සේයාරුව - සිරිපාල හල්වල
