හරි වහර ඇරැඹී දෙ වසරකුදු ඉක්මවන කලක් ගෙවී ඇත්තේ ය. අද ලියන බසෙහි යෙදෙන වැරැදි යෙදුම්, වැරැදි වදන් සිය ගණනෙක හරි වහර මෙ මඟින් හෙළි කරනු ලැබිණි. මුල් කල දී, ඉතා බෙහෙවින් යෙදෙන වැරැදි වදන්, යෙදුම් ම මෙහි ලා විමැසිල්ලට ලත් කැරුණු නමුදු, අනුක්‍රමික වැ, එ නම් අකාරාදි ක්‍රමයෙන් වදන් පෙළ ගස්වාලිවීම මැනැවැ යි ඇතැමුන් පෙන්වා දුන් හෙයින් එ සේ පෙළ ගැස්වුණු වදන් ම විමැසිල්ලට ලක් කැරිණි.
හරි වහරින් පල ලබන බොහෝ පිරිසක් වෙති යි ඇතැමුන් ගෙන් ලැබෙන ලිපි, ඇමැතුම් ආදියෙන් පෙනී යයි. ඒ ඉතා සතුටට කරුණෙකි. මෙ කුඩා ලිපිය කපා පොතෙක අලවා එක් රැස් කරන්නනුදු සිටුනා බව පැවැසේ. දින දින ම නැසී වැනැසී යන අප මවු බසෙහි - සිංහලයෙහි පැවැත්මට, නිවැරැදි වහරෙහි පැවැත්මට මෙයින් යන්තම් හෝ උදවුවක් ලැබේ නම් මෙහි ලා අප ගේ පැතුම් මුළුමනින් ඉටු වුණු සේ සැලැකිය හැකි යි. එහෙත් නෙළුම් හුයෙකින් මද කිපුණු ඇතකු ගේ ගමන වළකනු බැරි බව අපි හොඳින් දනිමු.
හරි වහර කියවන්නෝ විවිධ යෝජනා ද කෙරෙහි. ඇතැම්හු වැරැදි යෙදුම්, වදන් විස්තර නො කොට හුදු වැරැදි - නිවැරැදි යෙදුම් පමණක් දැක්වීම සෑහෙති යි ද, එසේ කළ හොත් එක් ලිපියෙකින් වැඩි වදන් ගණනක් දැක්විය හැකි වෙති යි ද පවසත්. සැබැවෙකි. එ වුව ද එවන් කාර්යයක් ශබ්ද කෝෂයක් බැලීමෙනුදු ඉටු කැරගත හැකි යි. ‘හරි වහරෙහිලා අපේක්ෂා කැරෙනුයේ එ බන්දක් කිරීම නො වේ; යම් වැරැදි යෙදුමක්, වැරැදි වදනක් එ සේ වැරැදි වන්නේ කවර හෙයින් ද යනු සකාරණ ව - කරුණු ඇති වැ - පෙන්වා දී ඉක්බිති එහි හරි වහර දක්වාලීම යි. බෙහෙවින් ම මෙයින් ආධුනිකයනාට වැඩක් වෙති යි සිතිය හැකි යි. යමකු කියූ පමණින්, පුවත්පතෙක පළ වූ පමණින් යමක් නිවැරැදි සේ සැලැකීම නැණවත් බවට ගැළපෙන්නක් නො වේ.
විමැසුම් නුවණ ඇති ඇතැමුනට හරි වහරෙහි දැක්වෙන විස්තර ද ප්‍රමාණවත් නොවන බව ඔවුන්ගෙන් ලැබෙන තැනැති (පෞද්ගලික) ඇමැතුම්වලින්, ලිපිවලින් මැනැවින් පෙනේ. ඔවුනට වුවමනා, යම් වදනක්, යෙදුමක් වැරැදි වන්නේ කවර හෙයින් ද යනු වඩාත් සියුම් වැ සවිස්තර වැ දැනගැන්ම යි. එ සේ කළහොත් එක් ලිපියෙකින් වදනකට, දෙකකට වඩා පැහැදිලි කරන්න බැරි විය හැකි යි. එ හෙයින් මැද ම‍ඟෙක සිට, ඇවැසි තන්හි සවිස්තර වැ, වැඩි වදන්, යෙදුම් ගණනක් එක් ලිපියෙකින් දක්වන්නට තැත් කැරේ.
යට කියැවුණු පරිදි, හරි වහර කපා අලවා සුරැකි ව තබා ගන්නා මහතාණ කෙනෙක් වෙනත් යෝජනාවක් කෙරෙති. නිවැරැදි යෙදුම පළමු වැ දක්වන සැටියට යි. දැනට කැරෙනුයේ වැරැදි පළමු වැ දක්වා එය නිවැරැදි වැ යොදන සැටි ඉක්බිති ව දැක්වීම යි. එ වුව ද එ මහතාණන් ගේ යෝජනාව වඩා මැනැවයි පෙනෙන හෙයින් අද සිට එසේ නිවැරැදි යෙදුම පළමු වැ දක්වමු. එය වරදවා යොදන සැටි පසු ව විස්තර කරමු. මුළු ලිපිය නො කියවා නිවැරැදි වදන පමණක් දැනගැන්මට කැමැතියනට ද එය මහත් පහසුවක් වනු ඇති.
1. කෙළිඳ - මෙහි (මූර්ධජ) ‘ළි’ යෙදෙන සැටි මැනැවින් සැලැකිල්ලට ගත යුතු යි. (දන්තජ) ‘ලි’ යොදා (කෙලිඳ යැ යි) ලිවීම වරදෙකි. මේ හා අනුරූප වැ සංස්කෘතයෙහි ‘කූටජ’ යනු යෙදේ. (මූර්ධජ) ‘ළ’ කාරය ම යෙදෙන බව එයිනුදු මැනැවින් තහවුරු වේ. ‘ඳ’ කාරයෙහි සඤ්ඤකය ආකස්මිත වැ (ඉබේ) යෙදුණකැ යි සිතිය හැකි ය. මේ වදන යෙදෙනුයේ එක්තරා ඖෂධ වර්ගයක් හඳුන්වනු පිණිසය.
2. කේවල - මේ නිවැරැදි වදන බොහෝ දෙනකු යොදතුදු කලාතුරෙකින් ‘කේවළ’ යැ යි (මූර්ධජ) ‘ළ’ කාර සහිත වැ වරදවා ලියන අයුරු දු දැකිය හැකි ය. මේ වනාහි පාලි - සංස්කෘත තත්සමයෙනි. එ දෙකෙහි ම (දන්තජ) ‘ල’ කරය ම යෙදේ. හුදු, තනි යන අරුත් හි මෙන් ම සම්පූර්ණාර්ථයෙහි ද යෙදෙන වදනෙකි.
