අපේ කාබනික පොහොරවලින් ලැබෙන අස්වනු ඉතා ඉහළයි

අංක 94/1, ඇල පාර, හැඳල වත්තල ලිපිනයේ පිහිටා ඇති ශ්‍රී ලක් පොහොර පුද්ගලික සමාගම යනු, වසර දහයකට වැඩි කාලයක් මෙරට කාබනික පොහොර නිෂ්පාදන ක්ෂේත්‍රයේ නිරත දේශීය කර්මාන්ත ආයතනයකි.

ව්‍යාපාර ක්ෂේත්‍රයේ වසර 30 ක අත්දැකීම් ඇති එම සමාගමේ සභාපති, එස්. තරනීස්පරන් මහතා කාබනික පොහොර නිෂ්පාදනයට අත ගැසුවේ මීට වසර දහයකට පෙර, රසායනික පොහොර මෙරට වැජඹෙමින් තිබු යුගයක ය. 

සත්ත්ව ආහාර නිෂ්පාදන ක්ෂේත්‍රයේ නියැළී සිටි ඔහු, පොහොර නිෂ්පාදන ක්ෂේත්‍රයට අවතීර්ණ වන්නේ, 2002 වසරේදී ය. ඒ, රසායනික පොහොර නිෂ්පාදනයට අත ගැසීමෙනි. නමුත්, කාබනික පොහොරවලට ඇති කැමැත්ත සහ උනන්දුව නිසාම කාබනික පොහොර නිෂ්පාදනය සඳහා ද ඔහු ක්‍රියාත්මක වූයේ ය.

එසේ නිෂ්පාදනය කළ කාබනික පොහොර, අසීරුවෙන් ගොවීන්ට හුරු කොට, යම් පමණක ගොවි ජාලයක් නිර්මාණය කර ගන්නට ඔහුට හැකි විය. එහෙයින්, ඔහුගෙන් කාබනික පොහොර මිල දී ගන්නට පෙළ ගැසුණු ගොවි ජාලයක් අද මෙන්ම එදත් සිටියේ කාබනික පොහොර පිළිබඳ මෙරට වැඩි උනන්දුවක් නොතිබූ යුගයක ය.

ව්‍යාපාරයෙන් ඔබ්බට ගිය විසල් සතුටක් අත්විඳින, සිය කාබනික පොහොර ව්‍යාපාරය පිළිබඳ ඔහු හඬ අවදි කළේ මෙලෙසිනි.

"ශ්‍රී ලක් සන්නාමය යටතේ අප නිෂ්පාදනය කරන්නේ කාබනික ඝන පොහොර, කාබනික දියර පොහොර සහ ජෛව දියර පොහොර යන තුන් වර්ගය යි. මේ අතරින් කාබනික ඝන පොහොර කර්මාන්තායතනය, මහියංගණයේ අක්කර තුනක භූමි භාගයක පිහිටා තිබෙන අතර, ජෛව දියර පොහොර සහ කාබනික දියර පොහොර නිෂ්පාදනාගාරය අපගේ වත්තල ඇලකන්දේ පිහිටි ප්‍රධාන කාර්යාලය සහිත අක්කරයක භූමි භාගයේ පිහිටා තිබෙනවා.

2002 වසරේ පටන් පොහොර නිෂ්පාදන ක්ෂේත්‍රයේ නියැළී සිටින නිසා, වගාවන් සහ පොහොර භාවිතාව පිළිබඳ බොහෝ අත්දැකීම් අප සතුයි. රජයේ කාබනික පොහොර ප්‍රතිපත්තිය ක්‍රියාත්මක කරන්නටත් පෙර පටන්, අප කාබනික පොහොර නිෂ්පාදන ක්ෂේත්‍රයට යොමු වුණේ එම අත්දැකීම් නිසයි.

කොහොම වුණත් රජයේ කාබනික පොහොර ප්‍රතිපත්තිය නිසා අපටත් විශාල උත්තේජනයක් ඇති වුණා. ඒ අනුව, 2021- 22 මහ කන්නය සඳහා, දියර පොහොර ලීටර 480,000ක් මඩකලපුව, ත්‍රිකුණාමලය සහ කුරුණෑගල දිස්ත්‍රික්කවල කුඹුරු ගොවිතැන් වෙනුවෙන් බෙදාහරින්නට අවස්ථාව ලැබුණා.

2022 යල කන්නයේ දී ජෛව දියර පොහොර ලීටර 550,000ක් මඩකලපුව, ත්‍රිකුණාමලය, අනුරාධපුර, නුවර සහ රත්නපුර දිස්ත්‍රික්ක වෙත බෙදා දුන් අතර, ඒ අවස්ථාවේ ම කාබනික ඝන පොහොර මෙට්‍රික් ටොන් 1,100 ක් පමණ ත්‍රිකුණාමලය දිස්ත්‍රික්කයටත් අප ලබා දුන්නා.

ඒ වගේම 2022- 23 මහ කන්නය සඳහා ජෛව දියර පොහොර ලීටර 150,000ක් සහ කාබනික දියර පොහොර ලීටර 105,000ක්

මඩකලපුව, ත්‍රිකුණාමලය සහ රත්නපුර දිස්ත්‍රික්ක සඳහාත් අප ලබා දුන්නා. එම අවස්ථාවේ ම කාබනික ඝන පොහොර මෙට්‍රික් ටොන් 3,200ක් මඩකලපුව සහ ත්‍රිකුණාමලය දිස්ත්‍රික්කවලටත් බෙදාහැරියා.

පොහොර නිෂ්පාදනයේ දී යොදාගන්නා අමුද්‍රව්‍ය පිළිබඳ අප විශේෂ අවධානයක් යොමු කරනවා. ඒ අනුව, ජෛව දියර පොහොර නිෂ්පාදනය සඳහා ෂුගර් මොලෑෂස්, මුහුදු පැළෑටි සහ හිතකර ක්ෂුද්‍ර ජීවීන් වර්ග කාණ්ඩ 5 ක් යොදා ගන්නවා. විශේෂයෙන් අප මුහුදු පැළෑටි ලබා ගන්නේ ත්‍රිකුණාමල මුහුදේ මේ සඳහාම මුහුදු පැළෑටි වගා කරන සැපයුම්කරුවන්ගෙන්.

කාබනික දියර පොහොර නිෂ්පාදනය සඳහා අවශ්‍ය මූලික අමුද්‍රව්‍ය ලෙස, අප මත්ස්‍ය කොටස් සහ ෂුගර් මොලෑෂස් භාවිත කරනවා. එම මත්ස්‍ය කොටස් අප ලබා ගන්නේ මීගමුව සහ දික්ඕවිට ධීවර වරායන් ගෙන්.

කාබනික ඝන පොහොර නිෂ්පාදනය සඳහා ගොම පොහොර, එළු පොහොර, කුකුළු පොහොර, කර දහයියා, ජපන් ජබර සහ ෂුගර් මොලෑෂස් මූලික අමුද්‍රව්‍ය ලෙස භාවිත කරනවා. ගොම ලබා ගැනීමේ දී වැලි ප්‍රතිශතය ඉතා අඩු, තත්ත්වයෙන් උසස් ගොම පමණයි අප අමුද්‍රව්‍යයක් ලෙස භාවිත කරන්නේ. ඒ වගේම, වැඩි ප්‍රතිඵල ලබා ගැනීම සඳහා කාබනික ඝන පොහොර නිෂ්පාදනයට ජෛව දියර පොහොර ද මිශ්‍ර කරනවා.

මේ ආකාරයට ත්‍රීකුණාමලයෙන් මුහුදු පැළෑටි ලබා දීමටත්, ධීවර වරායන්ගෙන් මාළු කොටස් ලබා දීමටත්, සත්ත්ව පොහොර, ජපන් ජබර, කර දහයියා වැනි අමුද්‍රව්‍ය ලබා දීම සඳහාත් 25කට ආසන්න සැපයුම්කාර ජාලයක් අප සමඟ සිටිනවා. අපගේ කාබනික පොහොර කර්මාන්තය හරහා මෙලෙස යැපෙන සෘජු හා වක්‍ර පිරිස 150කට ආසන්නයි.

අපගේ පොහොරවල විශේෂත්වය තමයි, මේ කිසිදු පොහොරක දුර්ගන්ධයක් නොමැති වීම. මොකද, ෂුගර් මොලෑෂස් අපගේ මේ සෑම පොහොරකට ම වගේ මිශ්‍ර වන නිසා, එයින් එන ප්‍රණීත සුවඳක් මිස දුර්ගන්ධගයක් වහනය වන්නේ නැහැ.

ඒ වගේම අපගේ දියර පොහොර අසුරා තිබෙන විශේෂිත මූඩියක් සහිත ඇසුරුම් ක්‍රමය නිසා, බෝතල් තුළ ක්ෂුද්‍ර ජීවීන් ක්‍රියාත්මක වුවත් ඒවා, ඇතුළේ විෂ වායු එකතු වීමක් නැහැ. එම නිසා දුර්ගන්ධයක් ද නැහැ.

අනෙක හිතකර ක්ෂුද්‍ර ජීවීන් බහුල පොහොර වර්ගයක් නිසා ගොයම් ගසට ලැබෙන ප්‍රතිශක්තිය ඉතා ඉහළයි. පසේ ලවණතාවයේ ගැටලුවක් නිසා හෝ පස තුළ ක්‍රියාත්මක ක්ෂුද්‍ර ජීවීන් හෝ සුළඟෙන් ඇති වන බෝවන ලෙඩ රෝගවලට ඔරොත්තු දීමේ ශක්තිය මෙම පොහොර යෙදූ විට කිහිප ගුණයකින් ඉහළ යනවා. ශාකයක් තුළ ප්‍රතිශක්තිකරණ ශක්තිය වැඩි නම්, එන ඕනෑම බාධාවක් ගැටලුවක් දරාගෙන වර්ධනය වීමේ හැකියාව ගහට ලැබෙනවා. අපේ පොහොරවලින් නොවැරැදීම ඒ ප්‍රතිශක්තිකරණය වගාවට ලැබෙනවා.

ඒ විතරක් නෙවෙයි, කෘමි විකර්ශක වාෂ්පශීලී සංයුතියක් ගස තුළ නිපදවනවා. එය ගහට වගේම, සමස්ත වගාවට ම හිතකර තත්ත්වයක්.

අපගේ ජෛව දියර පොහොර ශාකයට සහ මහ පොළොවට වැටුණු විට එහි ක්‍රියාත්මක ක්ෂුද්‍ර ජීවීන්ට පුළුවන්, පසේ ඇති පොටෑසියම් සහ පොස්පරස් ගහට උරා ගැනීමට හැකි වන පරිදි සංයුතීන් සකස් කර දෙන්න. මෙම ක්‍රියාවලිය සිදු වන්නට නම් ක්ෂුද්‍රජීවී ක්‍රියාකාරීත්වය අනිවාර්යෙන් ම සිදු විය යුතුයි. මේ සුවිශේෂී ගුණාංගය අපේ පොහොරවල ඇති තවත් විශේෂත්වයක්.

කාබනික ඝන පොහොර නිෂ්පාදනයේ දී බොහෝ අය නාගරික අපද්‍රව්‍ය, අමුද්‍රව්‍ය ලෙස පාවිච්චි කරනවා. නමුත් එවැනි කිසිදු නාගරික අපද්‍රව්‍යයක් අප අමුද්‍රව්‍යයක් ලෙස යොදා ගන්නේ නැහැ. එම නිසා අපගේ කාබනික පොහොරවල බැර ලෝහ රහිත බව තත්ත්ව පරීක්ෂණ වාර්තාවලින් තහවුරු වී තිබෙනවා.

ඒ නිසා වී වගාවට විතරක් නෙවෙයි, පලතුරු එළවළු වැනි කෙටි කාලීන බෝග සඳහාත්, තේ පොල් වැනි දිගු කාලීන බෝග සඳහාත් අපගේ කාබනික පොහොර ඉතා හොඳින් ක්‍රියාත්මක වන බව කිව හැකියි. මේ බව යළි යළිත් තහවුරු වන්නේ, පොහොර භාවිත කළ ගොවීන්ගෙන් ලැබෙන යහපත් ප්‍රතිචාර නිසයි.

වරක් පාවිච්චි කළ ගොවීන් නැවත වරක් අපගේ කාබනික පොහොර ලබා ගැනීම සඳහා දක්වන උනන්දුව, ඇත්තටම අපගේ උත්සාහය සාර්ථක වී ඇති බව කියාපාන හොඳම සාක්ෂිය යි.

අපගේ කාබනික පොහොර, වී ගොවිතැන සඳහා ප්‍රචලිත කළ ඒ මුල් කාලයේ, එහි සාර්ථකත්වය ගොවීන්ට පෙන්වා දීම සඳහා නියෝජ්‍ය කෘෂිකර්ම අධ්‍යක්ෂ/ ව්‍යාප්ති, එම්. පරමේශ්වරන් මහතාගේ අනුමැතිය යටතේ ත්‍රිකුණාමලයේ කන්තලේ ප්‍රදේශයේ ආදර්ශ වී වගා ව්‍යාපෘති දෙකක් කළා. එහිදී පාරම්පරික දේශීය සහලක් වන සුවඳැල් වගා කළ අතර, ඒ සඳහා භාවිත කළේ ජෛව දියර පොහොර සහ කාබනික ඝන පොහොර පමණයි. එවිට අක්කරයකට වී බුසල් 54 ක අස්වැන්නක් ගන්නට හැකි වුණා. එය, දේශීය වීවලින් ලැබිය හැකි ඉතා ඉහළ අස්වැන්නක්.

ඒ වගේම, BG 366 අලුත් වී ප්‍රභේදයක් සඳහා ද එම අත්හදා බැලීම ම අප සිදු කළා. ඒ, මහදිවුල්වැව ප්‍රදේශයේ අක්කරයක එම වී ප්‍රභේදය වගා කිරීමෙන්. එවිට අක්කරයකට වී බුසල් 105.6 ක ඉහළ අස්වැන්නක් ලබා ගන්නට හැකි වුණා. දේශීය වී වගාවකට වුවත්, නව වී ප්‍රභේදයකට වුවත් එක ලෙස අස්වනු වර්ධනය කිරීමට අපගේ කාබනික පොහොරවලට ඇති හැකියාව, මෙම ආදර්ශ වී වගාවෙන් ඉතා හොඳින් සනාථ වුණා. ඒ අනුව, 2022- 23 පසුගිය මහ කන්නයේ දී අපගේ මේ කාබනික පොහොර වර්ග තුනම ගොවීන් පාවිච්චි කළේ මහත් විශ්වාසයකින්.

ඒ විශ්වාසය කොතෙක්ද යත්, මුං ඇට සහ කවුපිවලටත් මේ පොහොර භාවිත කළ ගොවීන් සිටියා. මුං ඇටවලින් හොඳ ප්‍රතිඵල ලැබුණු බවත්, වෙනදා දින 40 කින් නෙළන අස්වනු, මෙවර දින 35කින් නෙළා ගන්නට හැකි වූ බවත් ඔවුන් පැවසුවා.

ඇත්තටම අපගේ පොහොරවල ගුණාත්මකභාවය වර්ධනය කිරීම පිළිබඳ අප නිතර research and development සිදු කරනවා. ඒ සඳහා අප ආයතනයේ ආචාර්ය අමිල හේනගමගේ ප්‍රමුඛ තාක්ෂණික උපදේශන කමිටුවක් නිරන්තරයෙන් ක්‍රියාත්මක වෙනවා. ඔවුන් අපගේ පොහොරවල ගුණාත්මකභාවය වර්ධනය කිරිම පිළිබඳ අඛණ්ඩ ව කටයුතු කරනවා.

අවුරුදු දහයකටත් වැඩි කාලයක් තිස්සේ, ශ්‍රී ලක් පොහොර පුද්ගලික සමාගම කාබනික පොහොර නිෂ්පාදනය කිරීමෙහිලා ප්‍රමුඛ ව කටයුතු කරන්නේ මේ අත්දැකීම් සමඟයි..."