සම්මානිත මහාචාර්ය සුනිල් ආරියරත්නගේ ‘කදිර දිව්‍යරාජ’ සිනමා කාව්‍යයේ රූගත කිරීම් අවසන් වී තිබිණි. මේ සිනමාවට නැඟී ඇත්තේ දිව්‍ය ප්‍රේම වංශකථාවේ ඉතා සුවිශේෂී තැනක් හිමි කරගන්නා කඳ සුරිඳුන් සහ වල්ලි මාතාවගේ ප්‍රේම වෘතාන්තය ය. චිරාත් කාලයක් තිස්සේ ලක්දිව් වැසි මනුෂ්‍යයන්ගේ අප්‍රමාණ වන්දනාවට ලක් වන කතරගම දෙවියන්ගේ ප්‍රේමනීය ජීවන පුරාවෘතය සිනමා කෘතිකයට ගොනු කිරීම කෙතරම් බරසාර ශාස්ත්‍රීය වෑයමක් විය හැකිදැයි සිතුණේ මේ සිනමා කෘතියේ කටයුතු ආරම්භ කළ බව සැල වුණු මොහොතේය.
සිනමා කෘතියට පාදක වන ජනප්‍රවාදය බොහෝ දෙනා දනිති. කෘතියේ ප්රධාන චරිතයක් වන වල්ලි මාතාව උපදින්නේ සෙල්ල කතරගම ය. ඇය ජීවත් වී තිබුණේ මැණික් ගඟ අසල ගල් තලාවක පිහිටි වල්ලි ගුහාව නම් ස්ථානයේය. මේ භූමිය අද සෙල්ලකතරගම පුද බිමය. සුරූපී වල්ලි යක්ඛ ගෝත්‍රයේ වැදි නායක නන්දගේ දරුවෝ වූහ. ඇයගේ සොයුරා කඩවර ය. කඩවර යක්ඛ ගෝත්‍රික වුවත් වල්ලිය වැදි නායකයා හදාගත් දියණියකි.
මහා බ්‍රහ්ම දෙවියන්ගේ සහ සරස්වතී දේව මැණියන්ගේ පුත්‍රයෙකු ලෙස සැලකෙන නාරද ඍෂිවරයාට සෙල්ල කතරගම හරහා ගමන් කරන අවස්ථාවක ගීයක් ගයමින් සිටි වල්ලියගේ ස්වරය කන වැකුණු බවත්, ඒ අසාමාන්‍ය ස්වරය කවරෙකුගේ දැයි විමසන විට ඔහුට මුව රැළක් හා සිටින ඉතා සුන්දර දෙවඟනක් බඳු කන්‍යාවක් දුටු බවත්, දේහ ලක්ෂණ ප්‍රකාරව ඇය කවුරුන් විය හැකි දැයි නාරද ඍෂිතුමා තම ඍෂි ඥානය උපයෝගී කරගෙන විමසා බලද්දී ඇය කඳ සුරිඳුන් වෙනුවෙන් පේවූ දේව කන්‍යාවක බවත් වටහා ගත්තේය. ඒ වන විට කතරගම දෙවියෝ තේවානි අම්මාන් දේව මෑණියන් හා විවාහ වී ඉන්දියාවේ ත්‍රිච්චන්දූර් නම් ප්‍රදේශයේ වාසය කරමින් සිටියේය. ඇය ඉන්ද්‍ර දෙවියන්ගේ දියණියකි. කඳ සුරිඳුන් ගේ ඊළඟ භාර්යාව වන්නට සුදුසු සුරූපී වල්ලිය සෙල්ල කතරගම වාසය කරන බව කතරගම දෙවියන්ට දන්වන්නේ නාරද ඍෂිතුමාය. සිනමා කෘතියට නැඟෙන්නේ මේ ප්‍රහර්ෂවත් ජන සාහිත්‍යයය. පූජා ගර්භ සංකල්ප හා කැටි වුණු ජන සාහිත්‍යයේ චමත්කාරය සිනමා කෘතියකට පරිවර්තනය කිරීමේ ප්‍රශංසනීය වෑයම විමසනු රිසිව රන්මිණිතැන්න මහින්ද රාජපක්ෂ ටෙලි සිනමා ගම්මානය පරිශ්‍රයට පිවිසුණෙමු. ඒ වෙනුවෙන් විශේෂ මාධ්‍ය සාකච්ඡාවක් සංවිධානය වී තිබිණි.
කඳසුරිඳුන් හා රුවින් උදුල වල්ලි මාතාව දැක ගනු රිසියෙන් පුල පුලා සිටි අප රන්මිණි තැන්නේදී ආදරයෙන් පිළිගත් සංවිධායක මඬුල්ල එම අවස්ථාව සඳහා අප කැඳවාගෙන ගියේය. සම්මානිත මහාචාර්ය සුනිල් ආරියරත්නයෝ ස්වකීය කෘතිය පිළිබඳ සිය අදහස් ප්‍රකාශ කිරීම ඇරඹූහ.
“මේ චිත්‍රපටයේ තිබෙන විශේෂත්වය පිළිබඳ මා පූර්විකාවේ සඳහන් කර තිබෙනවා. පෙරදිග හෝ අපරදිග දේව කතා සාහිත්‍යයේ මිනිස් දුවක් සරණ පාවාගත් දෙවියකු ගැන සඳහන් වෙනවා නම් ඒ කතරගම දෙවියන් ගැන පමණයි. සියැසින් නුදුටු කතරගම දෙවියන්ට බාල කාලයේ පටන් ආලය කළ, ඒ ආලයේ මහිමයෙන් ඔහු කතරගමට ගෙන්වා ගෙන සරණ කරගත් අසිරිමත් රූමතිය තමයි වැදි ජනයා අතර හැදුණු වැඩුණු වල්ලී. ඔවුන් දෙදෙනාගේ ප්‍රේම වෘත්තාන්තය වරෙක ඓතිහාසික යි... වරෙක සාහිත්‍යකයි... වරෙක විචිත‍්‍ර කලප්නාවක් හෝ මනෝ නිර්මිතයක් හෝ ස්වප්නමය සංසිද්ධියක්... කදිර දිව්‍යරාජ කෘතියෙන් සත්‍යයත් මායාවත් අතර දෝලනය වන්නා වූ වල්ලී - කඳකුමර ප්‍රේම ආඛ්‍යානය යි රූපණය කරනවා.”
“මේ සිනමා කෘතිය නිර්මාණය වන්නේ මේ සමාජය තුළ වන්දනාවට පාත්‍ර වන සංකල්පයක් පදනම් කරගෙන. ඒ නිර්මාණයේ ප්රධාන චරිත රූපණය සඳහා මා තෝරා ගත්තේ ඉන්දීය නළු නිළි දෙපළක්. මගේ ඇතැම් චිත්‍රපටවලට විදේශීය රංගන ශිල්පීන් යොදාගැනීම පිළිබඳ ඇතැම් උදවිය බොහෝ වාරයක් ප්‍රශ්න කර තිබෙනවා. මා ඊට නොයෙක් වර පිළිතුරු දී තිබෙනවා. මේ චිත්‍රපටයේ එන ප්රධාන චරිත දෙක වන කදිර දෙවිඳු සහ වල්ලි මාතාව මෙරට ජනයා බොහෝම දේවත්වයෙන් පුදනු ලබන දෙදෙනෙක්. එනිසා අපේ රංගන ශිල්පියකු කදිර දෙවිඳු ලෙස තෝරා ගතහොත් ඔහුට සිනමාවේ හෝ රූපවාහිනියේ සදාකල් කදිර දෙවිඳු වීමට බැහැ. ඔහුට වෙනත් දෙවියකු වීමට ද බැහැ. අපේ රංගන ශිල්පිනියක් වල්ලි මාතාවගේ චරිතය සඳහා තෝරාගත්තොත් සිද්ධ වෙන්නෙත් ඒ ඉරණමම තමයි. බැරි වෙලාවත් එහෙම කළා නම් ඔවුන් ඊළඟට රඟපාන චරිතත් සමඟ ඔවුනුත් අපත් දෙපාර්ශ්වයම බැනුම් අහනවා.
මීට ප්‍රථම මවිසින් කළ යශෝධරා චිත්‍රපටය සඳහා පල්ලවී සහ චෞද්රී යන භාරතීය ශිල්පීන් යොදාගත්තෙත් ඒ යථාර්ථය නිසාමයි. මා දේශීය ශිල්පිනියක් ‘පත්තිනි’ චිත්‍රපටයේ එක්තරා චරිතයකට යොදාගැනීම නිසා එවැනි අමිහිරි අත්දැකීමක් මට තිබෙනවා. මේ නිසා මට සමාජ මාධ්‍ය ඔස්සේ කුණු බැණුම් අහන්න සිද්ධ වුණා. ඒ නිසා බැණුම් අහනවට වඩා දෝෂාරෝපණ අහන එක හොඳයි කියා මා සිතනවා.
අචාර්ය රවී ලියනගේ ඇතුළු රයිගම් සමූහය නොවන්නට මේ නිර්මාණය මෙතරම් සාර්ථක වන්නේ නෑ. එමෙන්ම ප්රධාන චරිත ද්වය සඳහා මේ ඉන්දීය නළුනිළි දෙපළ සම්බන්ධ කිරීමට හා එහි සියළු වගකීම් භාර ගෙන කටයුතු කළ සහය අධ්‍යක්ෂක විමල් දේශප්‍රියට විශේෂ ස්තූතියක් පුදකරන්න මා කැමතියි. ඒ වගේම ඔවුන් හා සන්නිවේදන කටයුතු පහසු කර ගැනීම සඳහා අපට සහය වූ රිද්මාටත්, කැලණිය විශ්වවිද්‍යාලයේ හින්දි අධ්‍යනාංශයේ ජ්‍යෙෂ්ඨ මහාචාර්ය අංශ ප්රධාන උපුල් හේවාවිදානගමගේටත් ස්තූතිය පුද කරනවා.
 |
| සමර් විර්මානී සහ සොනාක්ෂි රාවන් |
මේ සිනමා නිර්මාණය නිමැවීම සඳහා මහැදුරු සුනිලුන් මූලාශ්‍ර 40කට වැඩි සංඛ්‍යාවක් වසර හතක් තිස්සේ පරිශීලනය කර තිබේ. එසේම මීට ප්‍රථම කදිරදේවයන් හා වල්ලි මාතාව පිළිබඳ කර ඇති සිනමා පටද අධ්‍යනය කර ඇත. එනිසා මෙය වෙසෙස් සිනමා කාව්‍යයක් වනවා නොවනු මානය.
මෙහිදී රයිගම් සමූහයේ අධිපති ආචාර්ය රවී ලියනගේ පවසා සිටියේ මහාචාර්ය සුනිල් ආරියරත්නයන්ගේ සිනමා කෘතියක් නිෂ්පාදනය කිරීමට ඔහු වසර ගණනාවක් බලා සිටිය බවයි. කෙතේ කමතේ වැඩ කළ සිය දෙමාපියන් මුතුන් මිත්තන් අස්වැන්නේ මුල් කොටස දෙවියන් වෙනුවෙන් පුද කළ සංස්කෘතික මිනිසුන් බැවින් කදිර දෙවියන් ගැන කෙරෙන මේ නිර්මාණයට තමන්ට දායක වීමට අවස්ථාව දීම ගැන ගෞරවය පුදකරන බවය.
මෙම චිත්‍රපටයේ කදිර දෙවියන් ලෙස රංගනයෙන් දායක වන්නේ භාරතීය රංගන ශිල්පී සමර් විර්මානීය. ඔහු කියා සිටියේ මේ චරිතය තමන්ට ලැබුණු මහඟු අවස්ථාවක් මෙන්ම අභියෝගයක්ද වූ බවය. ඒ සඳහා අවස්ථාව හිමි කරදීම සම්බන්ධයෙන් හේ මහාචාර්ය ආරියරතන්යන්ට ගෞරවාදර ස්තූතිය පුද කරන්නේය.
වල්ලි මාතාවගේ චරිතය නිරූපණය කරන භාරතීය රංගන ශිල්පිනී සොනාක්ෂි රාවන් ප්‍රකාශ කර සිටියේ තමන් සම්බන්ධ කරගැනීම පිළිබඳ තමන් විස්මයට පත් වූ බවය. ඇය මීට ප්‍රථම කිසිදු සිනමා පටයකට සම්බන්ධ වූ අයෙක් නොවේ.
‘කදිර දිව්‍යරාජ’ සිනමා පටයේ ප්රධාන නළු නිළියන් ලෙස භාරතීය රංගන ශිල්පී සමර් විර්මානී(කදිර දෙවියන්), භාරතීය රංගන ශිල්පිනී සොනාක්ෂි රාවන් (වල්ලි මාතාව), රොෂාන්පලිපිටිය, නිල්මිණි තෙනන්කෝන්, ජගත් චමිල, චරිත් අබේසිංහ, වසනත් විට්ටච්චි, දීපා රණසිංහ, සරත් කොතලාවල, ධනංජය සිරිවර්ධන, විනූ උදානි සිරිවර්ධන, හරිනි උත්පලා, අජිත් ශාන්ත, සමුදි ජයසිංහ, වසනත් කුමාරවිල, ෂෙලට්න් කැකුලාවල, රජිත රොද්‍රිගු, රංගී රාජපක්ෂ සම්පත් තෙනන්කෝන් රංගනයෙන් දායක වෙති.
