ජනපති ධුරයට පත් වීමෙන් පසු ගෝඨාභය රාජපක්ෂ මහතාගේ ප්‍රථම මාධ්‍ය සම්මුඛ සාකච්ඡා පැවැත්වූයේ ඉන්දියාවේ භාරත්ශක්ති සහ SNI මාධ්‍ය ජාලයේ ප්‍රධාන කර්තෘ නිතින් ඒ. ගෝකල් සමඟය චීනය සමඟ ශ්‍රී ලංකාව පවත්වන්නේ වාණිජ
සම්බන්ධතාවක් යැයි ඔහු එහිදී කීවේය. ඉන්දියාව, ජපානය, සිංගප්පූරුව සහ ඕස්ට්‍රේලියාව යන කලාපයේ බලවතුන් වෙත පණිවුඩයක් නිකුත් කරමින් ජනාධිපතිවරයා එහිදී පැවැසුවේ මේ රටේ ආයෝජන කිරීමට පැමිණෙන ලෙසය. චීනයට පමණක් ආයෝජන සිදු කිරීමට ඉඩතබා ඉන්පසු මැසිවිලි නඟන්නේ නැතිව මෙරටට උදව් කරන ලෙස ජනාධිපතිවරයා එහිදී වැඩිදුරටත් කීවේය. මේ එහිදි පැවැත්වුණු සම්පූර්ණ සාකච්ඡාවයි.
✦ ආයුබෝවන්, මම නිතින් ගෝකල්. ශ්‍රී ලංකාවේ නව ජනාධිපති ගෝඨාභය රාජපක්ෂ මහතා සමඟ මෙම සම්මුඛ සාකච්ඡාව පවත්වන්නට ලැබීම මා ලද භාග්‍යයක්. හිටපු සොල්දාදුවකු වන ඔහු පසුව පරිපාලකයකු වී අනතුරුව රටේ විධායක ජනාධිපති බවට පත් වුණා. ගෝඨාභය මහතා ඔබව ආයුබෝවන් කියා පිළිගන්නවා. ඔබ මේ කාලය ලබාදීම මට මහත් ගෞරවයක් ලෙස සලකනවා. මම හිතනවා මෙය ඔබ ජනාධිපති ධුරයට පත් වීමෙන් අනතුරුව ලබාදෙන පළමු සම්මුඛ සාකච්ඡාව කියලා. ශ්‍රී ලංකාවේ නව ජනාධිපති වශයෙන් ඔබ ප්‍රමුඛත්වය ලබාදෙන්නේ කුමන කාරණාවලට ද? ඔබගේ ප්‍රමුඛතා මොනවාද?
අපි ජනතාවට ප්‍රතිපත්තියක් ලබා දුන්නා. අප ක්‍රියාත්මක කරන නිශ්චිත ක්‍රියාමාර්ග එහි සඳහන් කොට තිබෙනවා. මුලින්ම කළ යුතු දේ තමයි රටේ සහ ජනතාවගේ ආරක්ෂාව තහවුරු කිරීම. ඒ සඳහා විශේෂයෙන්ම හමුදා යාන්ත්‍රණය තුළ ඇතැම් දේවල් නැවත සකස් කිරීමට සිද්ධ වෙනවා. ඒ වගේම තමයි බුද්ධි අංශ, අනෙක් පැත්තෙන් ආර්ථිකය. ඒ දේවල් නැවත සකස් කරන්න මට සිද්ධ වෙනවා. මේ අවස්ථාවේ ඒ කාරණා ඉතාම වැදගත් වෙනවා. අවධානය යොමු කළ යුතු සහ වර්ධනය කළ යුතු අංශ කිහිපයක් ගැන මම කල්පනා කරලා තිබෙනවා. ඒ අනුව ආරක්ෂාව සහ ආර්ථිකය මූලිකත්වය දිය යුතු කාරණා දෙකයි.
✦ හතර වැනි ඊලාම් යුද්ධයේ දී සමස්ත ආරක්ෂක ව්‍යුහය පුනර්ජීවනය කිරීම ගැන ඔබ කීර්තියක් උසුලනවා. ඔබ බුද්ධි අංශ ව්‍යුහයක් ප්‍රතිස්ථාපිත කළා. ඇත්තෙන්ම සමස්ත යුද ප්‍රයත්නය මෙහෙය වූයේ ඔබයි. ඇතැම් අතපසු වීම් සිදු වූ පසුගිය වසර පහ ඇතුළත තත්ත්වය ඔබ දකින්නේ කෙසේද? අප්‍රේල් 21 වැනිදා පාස්කු බෝම්බ ප්‍රහාරයක් සිදු වුණා.
ආණ්ඩුවේ ප්‍රතිපත්තිවලින්ම ආරක්ෂාවට මුල් තැනක් දුන්නේ නැති නම්, ජාතික ආරක්ෂාව ප්‍රමුඛ කාරණාවක් නොවුණහොත් එය පහළම තලයට වැටෙනවා. පසුගිය ආණ්ඩුව ජාතික ආරක්ෂාවට ප්‍රමාණවත් තරම් අවධානයක් යොමු කළේ නැහැ. අනෙක් අතට ආර්ථික ස්ථාවරභාවය ඇති කිරීමට ජාතික ආරක්ෂාවේ වැදගත්කම ඔවුන් තේරුම් ගත්තේ නැහැ. මුලින්ම පුරවැසියන්ට සහ ආයෝජකයන්ට ආයෝජනය කිරීම සඳහා ස්ථාවර රටක් තිබිය යුතුයි. දේශීය ව්‍යාපාරිකයන්ට ආයෝජනය කිරීම සඳහා, ව්‍යවසායකයන්ට ආයෝජනය කිරීම සඳහා, ජාතික ආරක්ෂාව ඉතාම වැදගත් වෙනවා. පසුගිය වසර පහ ඇතුළත සිදු වූයේ එයයි. පසුගිය ආණ්ඩුව රටේ ආරක්ෂාව ගැන ප්‍රමාණවත් තරම් අවධානයක් යොමු කළේ නැති නිසා විශේෂයෙන්ම මානුෂීය මෙහෙයුමේ නිරත වූ නිලධාරීන් ගැන පරීක්ෂණ පැවැත්වූ නිසා ආරක්ෂක අංශවල ආත්ම විශ්වාසයට බලපෑම් සිද්ධ වුණා.
එසේම ජාතික බුද්ධි අංශවලත් විවිධ කාරණා සිද්ධ වුණා. බුද්ධි අංශ සඳහා අපට විවිධ නියෝජිතායතන පවතිනවා. බුද්ධි කටයුතු ඉතාම වැදගත් වෙනවා. එය ආරම්භ වන්නේ රාජ්‍ය බුද්ධි සේවය සමඟයි. එයයි අංක එකේ සිවිල් ආයතනය වන්නේ. ඊළඟට අපට හමුදා බුද්ධි අංශය තිබෙනවා. එය හමුදා බුද්ධි අංශය ලෙස හැඳින්වෙනවා. නාවික හමුදා බුද්ධි අංශය සහ ගුවන් හමුදා බුද්ධි අංශය තිබෙනවා. ඒ සියල්ල අතරින් වඩාත්ම අත්දැකීම් සහිත බුද්ධි අංශය වන්නේ යුද හමුදා බුද්ධි අංශයයි. ඊළඟට අපරාධ පරීක්ෂණ දෙපාර්තමේන්තුව තිබෙනවා. ත්‍රස්ත විමර්ශන අංශය තිබෙනවා.
✦ කලින් අවස්ථාවල දී ඔවුන් හොඳයි ඒත් බුද්ධි තොරතුරු පුරෝකථනයට නොවෙයි. 
පි. බුද්ධි කටයුතු කියන්නේ වෙනස් ක්‍රියාවක්. ඒත් පසුගිය ආණ්ඩුව හමුදා බුද්ධි අංශයට නිසි බලතල දුන්නේ නැහැ. ඒ නිසා කිසියම් ආකාරයකින් ඔවුන් තොරතුරු රැස් කිරීමේ කටයුතුවල, හඳුනාගැනීම්වල නිරත වුණේ නැහැ. එය වැඩියෙන්ම සිදු වූයේ අපරාධ පරීක්ෂණ දෙපාර්තමේන්තුවේ සහ ත්‍රස්ත විමර්ශන අංශයේ. සමහර විට රාජ්‍ය බුද්ධි අංශයේත් එසේ සිදු වන්න ඇති. ඒත් මම කියන්න කැමැතියි ඒ අය වෙනස් අංශවලින් විශේෂඥතා දක්වනවා කියලා. ඒ වෙනත් දෙයක් නිසා නොවෙයි අපේ රටේ දීර්ඝ කාලයක් යුද්ධයක් පැවැති නිසා ත්‍රස්ත මර්දනය දියුණු වී තිබෙන නිසායි. එහිදී ප්‍රධාන කාර්යභාරයක් ඉටු කළේ හමුදා බුද්ධි අංශයි. ඔවුන්ට හොඳ පුහුණුවක් ලබාදීමත් අත්දැකීම් සහිත වීමත් ඊට බලපෑවා. ඒ නිසා එය කඩිනමින් නතර කර වෙනත් ආයතනයකට ලබාදීම අපහසු කාරණාවක් වෙනවා. මම හිතනවා එය මෙයට බලපෑ තවත් කාරණාවක් කියලා.
ඇත්තෙන්ම පළමු කාරණය වන්නේ ආණ්ඩුවේ ප්‍රතිපත්තියයි. දෙවැනි කාරණාව වන බුද්ධි කටයුතු සඳහා වගකිව යුතු ආයතනවලට නිසි බලතල ලබා නොදුන්නොත් එයට ක්‍රියාත්මක වීම අපහසුයි.
✦ ඔබ ආරක්ෂක ලේකම් ලෙස කටයුතු කළ සමයේ ඒ සියල්ල එකම ජාලයකට එකතු කළා.
ඒ කාරණා ගැන ඉතාම විශිෂ්ට අත්දැකීම් ඇති ආරක්ෂක ලේකම්වරයෙකු දැන් පත් කර තිබෙනවා. ඔහු කැප වී කටයුතු කළ නිලධාරියෙක්. මේ ආයතන වෙන වෙනම දෙපාර්තමේන්තු ලෙස කටයුතු කිරීම නවත්වා ප්‍රතිසංවිධානගත කර සියලු බුද්ධි ආයතන ඒකාබද්ධ කර, එක්ව කටයුතු කිරීමට සලස්වන ලෙස මම ඔහුට උපදෙස් දී තිබෙනවා. ඔවුන් අතර තොරතුරු බෙදාගැනීම වැදගත් කාරණයක්. ඔහු ඒ කටයුතු සිදු කරාවි.
✦ ඔබ විශ්වාස කරනවාද ඔහු වටේ තිබෙන රටවල් සමඟ සහයෝගයෙන් වැඩ කළ යුතුයි කියලා. උදාහරණයක් වශයෙන් ඉන්දියාව සහ අනෙක් රටවල් වගේ, නැති නම් බටහිර රටවල් වගේ. මොකද බුද්ධි තොරතුරු හුවමාරු කරගැනීම අද දවසේ ඉතාම වැදගත් වෙන නිසා?
ඔව්. බුද්ධි තොරතුරු හුවමාරු කරගැනීම අද දවසේ ඉතාම වැදගත් වෙනවා. එල්.ටී.ටී.ඊ. ත්‍රස්තවාදීන්ට බැහැරින් උදව් ලැබුණා. ඒත් ඒ එල්.ටී.ටී.ඊ.යට බාහිර ආයතනවලින්. එය අන්තර්ජාතික සංවිධානයක් නෙවෙයි. එත් මෙතැනදී එහෙම නොවෙයි. මම කියන්නේ අපි මෙහි එක් කොටසක් පමණයි. විශාලම සංවිධානය පවතින්නේ බාහිරවයි. එය අන්තර්ජාතිකයි, ගෝලීයයි. ඒ නිසා අප බාහිර ආයතනවලින් විශාල වශයෙන් උපකාර ලබාගැනීම වැදගත් වෙනවා. ඒ රටවල්වලටත් මේ ප්‍රශ්නය තිබෙන නිසා එය හැමෝටම වැදගත් වෙනවා. ඉන්දියාව හෝ වෙනත් ඕනෑම රටක්, කොටින්ම ලොව තිබෙන බොහෝ රටවල් මේ ප්‍රශ්නයට මුහුණ දෙනවා. ඒ නිසා ඔවුන් මේ කටයුතුවලට සම්පත් වෙන් කිරීම, තාක්ෂණය යෙදීම සහ ඉස්ලාම් ත්‍රස්තවාදීන් ගැන දැනුම බෙදාගැනීම ගැන ඉතාම උනන්දුවෙන් කටයුතු කරනවා. ඒ නිසා අප ඒ අත්දැකීම් සහ දැනුම භාවිත කළ යුතුයි.
✦ මේ චෝදනාව යුද්ධය අවසන් වූ පසු එනම් 2010 කාලයේ සිට පැවත එනවා. 2009 දී යුද්ධය අවසාන වුණාට පස්සේ ශ්‍රී ලංකාවට මේ තරම් විශාල යුද හමුදාවක් අවශ්‍ය වන්නේ නැතැයි කියලයි කියන්නේ. ඒ ගැන ඔබගේ අදහස?
රට ඉදිරියේ මතු වී ඇති තර්ජන ගැන විශ්ලේෂණය කර අවශ්‍ය වන හමුදාවේ ශක්තිය තීරණය කිරීම හමුදාවට සහ එහි නායකයන්ට අයත් කාරණාවක්. ගැටුම් සිදු වූ කාලයේදීත් හමුදාවේ ශක්තිය වැඩි කළේ ඒ අනුවයි. පසුගිය වසර 10ක කාලය ඇතුළත අප හමුදාවට බඳවාගැනීම් කළේ නැහැ. අවශ්‍ය කරන වේගයෙන් අප බඳවාගැනීම් සිදු කර නැහැ. ඒ නිසා සාමාන්‍ය‍යෙන් පසුබැසීමක් සිදු ව ඇති අතර සංඛ්‍යාත්මකව අඩු වීමක් සිදු වී තිබෙනවා.
ඒත් ගැටුම් පැවැති කාලයේ දී අපට පාබල පිරිස සහ සන්නද්ධ පිරිස සහ වෙනත් සටන්කාමී පිරිස විශාල වශයෙන් අවශ්‍ය වුණා. ඒත් දැන් අපට ඒ ගැන වෙනස් ආකාරයකින් සිතීමට හැකියි. විදේශ රටවල්වල පවා රටේ සංවර්ධන කටයුතුවලට හමුදාව යොදා ගන්නවා අප දැකලා තියෙනවා. අමෙරිකානු හමුදාවත් ඒ වගේ සංවර්ධන ක්‍රියාමාර්ගවල නිරත වෙනවා. ඒ නිසා අපටත් ඒ ගැන අවධානය යොමු කරලා ඒ විධියට හිතන්න අවස්ථාව තියෙනවා.
ඒත් මේ වගේ අවස්ථාවක බුද්ධි තොරතුරු රැස් කිරීම ගැන වැඩි අවධානයක් යොමු කිරීම ඉතාම වැදගත් වෙනවා. තොරතුරු රැස් කරන්නන් පුහුණු කිරීමට, ඒ යාන්ත්‍රණය වැඩි දියුණු කිරීමට අපි වැඩි වශයෙන් මුදල් වෙන් කළ යුතුයි. තර්ජනයේ ස්වරූපය අනුව අප හැඩගැසිය යුතුයි.
✦ මම ආර්ථිකය දෙසට යොමු වෙන්න කැමැතියි. විශේෂයෙන්ම සංචාරක කර්මාන්තය පහළ වැටුණා. ඒත් දැන් ඔබ ජනාධිපති ලෙස පත් වී තිබෙනවා. ආයෝජකයන් සහ සංචාරක කර්මාන්තය මෙහෙයවන්නන් අතර විශ්වාසය ගොඩනැඟී තිබෙනවා. ආර්ථිකය සම්බන්ධයෙන් ඔබගේ ඇති පුළුල් සැලැස්ම කුමක්ද?
අප අවධානය යොමු කර ඇති ක්ෂේත්‍ර රැසක් තිබෙනවා. වැවිලි කර්මාන්තය සහ කෘෂි කර්මාන්තය ඉතා වැදගත් වන බව අප තේරුම් ගත යුතුයි.
තවමත් අපගේ ජනගහනයෙන් තුනෙන් එකක් නිරත වන්නේ කෘෂි කර්මාන්තයේ. ඒ නිසා අපට කෘෂි කර්මාන්තය අමතක කරන්න බැහැ. ඇතැම් අවස්ථාවල විදේශ උපදේශකවරුන් පවසනවා අපි අනෙක් ක්ෂේත්‍ර ගැන අවධානය යොමු කළ යුතුයි කියලා.
එහෙත් මෙය අපේ සංස්කෘතිය, අපේ ඉතිහාසය සමඟ සම්බන්ධ වී පවතිනවා. ඒ නිසා අපට එය කළ නොහැකියි. අද දවසේ ලෝකයේ කිසිම රටකට ආහාර සුරක්ෂිතතාව අමතක කර පැවැතිය නොහැකියි. එය ඉතාම වැදගත් වෙනවා. අපට විදේශ රටවල්වලින් යැපීමට නොහැකියි. එය අපේ සංස්කෘතියේ තිබෙන දෙයක්. එය අපට සංවර්ධනය කළ හැකි අංශයක්. ඉතින් එය මම මූලිකත්වය දෙන කාරණාවක්. අද අපට තාක්ෂණය තිබෙනවා. අප කෘෂි කර්මාන්තයට තැනක් දුන්නේ කවදාද? ඔබ දන්නවා පැවැති ආණ්ඩු රැසක්ම කෘෂි කර්මාන්තයට වැඩ කළ බව. ඒත් ගොවියාගේ දුප්පත්කම නැති වී නැහැ.
✦ ගොවියාට ප්‍රතිලාභ ලැබුණේ නැහැ.
මෙහි නරක ප්‍රතිඵලය තමයි ඒ. ගොවියන්ගේ දරුවන් කෘෂි කර්මාන්තයට යොමු වන්නේ නෑ. තම මවුපියන්ගේ දුප්පත් තත්ත්වය ඔවුන්ට පෙනෙනවා. අප ඔවුන්ට සහාය දිය යුත්තේ මෙතැනදීයි. ඉහළ නිෂ්පාදනයක්, ඉහළ ආදායමක් ලබාගත හැකි තාක්ෂණයක් සහ නවීන උපකරණ අද ඕනෙ තරම් පවතිනවා. පොහොර කළමනාකරණය, කාබනික පොහොර භාවිතය, හරිතාගාර, ජල කළමනාකරණ කෘෂිකර්මය, සිරස් කෘෂි කර්මය, අධි තාක්ෂණික බීජ වර්ග ආදියෙන් ඉහළ ඵලදායීතාවක් ලබාගත හැකියි.
ඒ වගේම පර්යේෂණ සහ සංවර්ධනයන් ඉතාම වැදගත් වෙනවා. මේ දේවල් සංවර්ධනය කළ යුත්තේ ආණ්ඩුව මඟින්. ඒ නිසා ගොවීන්ට වැඩි ආදායමක් ඉපැයීමට මඟ පෙන්විය හැකියි. ඒ මඟින් කෘෂි කර්මාන්තය පදනම් කරගත් කර්මාන්ත සංවර්ධනය කිරීමට අපට හැකි වෙනවා. එමඟින් ගොවියා ව්‍යවසායකයකු කිරීමට හැකි වෙනවා.
✦ ඔබගේ ශක්තිය මහා පරිමාණ යටිතල පහසුකම් ව්‍යාපෘති ඉදි කරලා නිසි කාලයට ඉදිරිපත් කිරීමයි.
යටිතල පහසුකම් ඉදි කිරීම ඉතා වැදගත්. නැති නම් සංවර්ධනය පිටතට ගෙන යෑම කළ නොහැකියි. කෘෂි කර්මාන්තයේ සහ වැවිලි කර්මාන්තයේ වර්ධනය කළ හැකි අංශ බොහොමයක් පවතිනවා. ශත වර්ෂ ගණනාවක් අපේ රටේ ප්‍රධාන විදේශ මුදල් උත්පාදනය කරන මාර්ගය වූයේ තේ, රබර් සහ පොල් කර්මාන්තයයි. ඒත් අද දවසේ, අයහපත් කළමනාකරණය සහ තවත් හේතු නිසා මේ ක්ෂේත්‍රවල ආදායම අඩු වී තිබෙනවා.
ලොව විශිෂ්ටතම ගම්මිරිස් නිෂ්පාදනය කරන්නේ අපයි. ලොව හොඳම කුරුඳු වන්නේ අපේ කුරුඳුයි. ඒ නිසා අපට කළ හැකි කාරණා රැසක්ම තිබෙනවා. අවාසනාවකට වගේ රටේ තිබෙන දේවල් රැසක්ම අප ආනයනය කරනවා. අපට ඒවා තවදුරටත් වර්ධනය කරලා විදේශ විනිමය වැඩි කරගන්න පුළුවන් වේවි. නිකම්ම අපනයනය කරන්නේ නැතුව අගය එක් කර අපනයනය කිරීමට අප කටයුතු කළ යුතුයි. ඒ නිසා හැම අතින්ම අගය එකතු කිරීමටත්, සාම්ප්‍රදායික ක්‍රමවලින් ඉවත් වී නවීන පර්යේෂණවලින් සොයාගන්නා වර්ධනයන් ප්‍රයෝජනයට ගැනීමටත්, නිෂ්පාදන සංවර්ධනයන් ඇති කිරීමටත් අප පුරුදු විය යුතුයි.
✦ අද දවසේ ගුණාත්මක දේ සඳහා වැඩි මිලක් ගෙවීමට ලෝකයේ සූදානමක් තිබෙනවා.
ඔව්, අන්න ඒකයි අප කළ යුත්තේ. ඒ වගේම අප කෘෂි කර්මාන්තය ගැන කතා කළ යුතුයි. නිසි ජල ප්‍රමාණය භාවිත කිරීමේ වැදගත්කම ගැන ගොවීන් දැනුම්වත් කළ යුතුයි. අනෙක් අතට ගොවීන් ජලය නාස්ති කරනවා. ඒ වගේම තමයි පොහොර භාවිතය. නිසි පොහොර ප්‍රමාණය භාවිත කිරීමත්, ගුණාත්මකභාවය රැකගැනීමත් වැදගත් කාරණයක්. ඒ වගේම ටිකෙන් ටික කාබනික ගොවිතැනට යොමු වීම වැදගත් වෙනවා. අද දවසේ කාබනික ආහාර සඳහා ඉහළ ඉල්ලුමක් ඇති වී තිබෙනවා. අප ගොවීන්ව දැනුම්වත් කළ යුත්තේ මේ සම්බන්ධවයි.
✦ ඔබ එසේ පැවැසීම ගැන මට සතුටුයි.
අපගේ කාර්මික අංශය එතරම් පුළුල් නොවන නිසා 21 වැනි සියවස දැනුම පදනම් කරගත් ශත වර්ෂයක් ලෙස හැඳින්වීම යහපත් දෙයක්. අධි තාක්ෂණය භාවිත කරන කර්මාන්ත කිහිපයක් අපට තිබෙනවා. තෙල්, ගෑස්, රිදී වගේ ස්වාභාවික සම්පත් අපට නැහැ. ඒත් වැදගත්ම කාරණාව වන්නේ අපට ඉතා හොඳ හැකියාවන් ඇති, පුහුණු කිරීමට පහසු මානව සම්පතක් සිටීමයි. අප අවධානය යොමු කළ යුත්තේ ඒ අංශය දෙසයි.
අද දවසේ සංවර්ධනය වැඩි වශයෙන්ම කේන්ද්‍රගත වී ඇත්තේ ආසියානු කලාපයේයි. ඉන්දියාව, සිංගප්පූරුව, මලයාසියාව, ඉන්දුනීසියාව, වියට්නාමය, ජපානය සහ චීනය මේ අතර ප්‍රමුඛත්වයක් පෙන්නුම් කරන රටවල්. මේ රටවල් රැසක්ම දියුණුව කරා පැමිණියේ තාක්ෂණය සහ මානව සම්පත දියුණු කිරීමෙන් කියලා අපට පෙනෙනවා. අපට හොඳ අවස්ථාවල් ඇති කරගත හැක්කේ එමඟින් තමයි.
තොරතුරු තාක්ෂණය, ඩිජිටල් තාක්ෂණය හමුවේ තරුණ පරපුරට විශාල ආදායමක් උපයාගත හැකියි. තරුණ පරපුරට යහපත් අධ්‍යාපනයක් ලබාදී නව ලෝකයේ අවශ්‍යතා වෙනුවෙන් සූදානම් කළ යුතුයි.
✦ ඔබගේ විදේශ ප්‍රතිපත්තිය කුමක්ද?
මම ධුරය භාරගන්නා අවස්ථාවේ දී ප්‍රකාශ කළ කරුණක් තමයි අපි මධ්‍යස්ථ රටක් වශයෙන් කටයුතු කරනවා කියන එක. එය කළ හැකි දෙයක්. ඒ සඳහා උදාහරණ ලෝකයේ පවතිනවා. වර්තමාන ගෝලීය දේශපාලනයේ ඉන්දියන් සාගරය වැදගත් භූමිකාවක් දරනවා. පෙරදිග සහ බටහිර මුහුදු නෞකා මාර්ගයේ අපේ රට පිහිටා ඇත්තේ ක්‍රමෝපායික වශයෙන් වැදගත් ස්ථානයක. ගෝලීය සම්පත් ප්‍රවාහනයේ දී මෙය ඉතාම වැදගත්. මේ මුහුදු මාර්ගවල අයිතිය ලෝකයේ සියලුම ජාතීන්ට එක ලෙස පැවැතිය යුතුයි. එයට හේතුව ඒවා ඉතාම වැදගත් නිසායි.
ඉන්දියාවේ ආරක්ෂාව අප ඉතාම වැදගත් කොට සලකනවා. එයට තර්ජනයක් වන කිසිම කාරණයක අප නිරත වන්නේ නැහැ. අප ඉන්න ප්‍රදේශයේ ඉන්දියාව විශාල රටක්. එරටට අති විශාල හමුදාවක් තිබෙනවා. ඒත් අප තවදුරටත් ස්වාධීන රාජ්‍යයක්ව පැවැතීම අගය කරනවා. ඉන්දියාව, සිංගප්පූරුව, මලයාසියාව, ඉන්දුනීසියාව, චීනය, ජපානය වගේ කලාපීය රටවල් අපට ඉතාම වැදගත්. අප යථාර්ථයට මුහුණ දිය යුතුයි.
✦ ඔබ ළඟදී ඉන්දියාවේ සංචාරයක නිරත වෙනවා. මෙහිදී සාකච්ඡා කිරීමට බලාපොරොත්තු වන ප්‍රධාන කාරණා මොනවාද?
පි. අපි ඉන්දියාව සමඟ මිතුරු රාජ්‍යයක් ලෙස කටයුතු කිරීමට සූදානම් බව මම ඔවුන්ට සහතික කිරීමට කැමැතියි. එරට ආරක්ෂාවට තර්ජනය වන කිසිදු කටයුත්තක අප නිරත නොවන බවත් මම කියන්නයි ඉන්නේ. අපේ රටේ ආයෝජනය කරන්න කියා ආරාධනා කරන්නත් මම බලාපොරොත්තු වෙනවා. මම හිතනවා ඉන්දියාවේ වත්මන් අගමැති මෝදි අසල්වැසි රාජ්‍යයන් සමඟ සමීප සම්බන්ධතා ඇති කරගැනීමට සූදානමින් සිටිනවා කියලා.
✦ දැන් ඔබ මුළු රටේම නායකයා. සුළු ජාතිකයන් සමඟ ප්‍රතිසන්ධානය පවත්වාගෙන යෑමට ඔබ ගන්නා ක්‍රියාමාර්ග මොනවාද?
පි. මම හිතනවා සංවර්ධනය තමයි මේ ප්‍රශ්නයට ලැබිය යුතු පිළිතුර කියලා. පසුගිය කාලයේ ඇතැම් දෙමළ දේශපාලන නායකයන් වගේම ඇතැම් සිංහල නායකයනුත් ප්‍රායෝගික නොවන, කළ නොහැකි, මිනිසුන් ගොනාට අන්දන කාරණා රැසක් ඉදිරිපත් කළා. ශ්‍රී ලාංකිකයන්ට ජීවත් වීමට හොඳ අවස්ථා ඇති රටක් හැදීමෙන්, හොඳ අධ්‍යාපනයක් ලබාගැනීමට අවස්ථාව උදා කරදීමෙන්, හොඳ රැකියා ඇති කරදීමෙන් සහ අභිමානයෙන් යුතුව ජීවත් වීමට අවස්ථාව ලබාදීමෙන් ඔය ප්‍රශ්නය විසැඳිය හැකියි. පුරවැසියන්ගේ සුබසාධනය සැලසිය යුතුයි. රට සංවර්ධනය කිරීමයි විය යුත්තේ.
