ජනතා විමුක්ති පෙරමුණ ප්‍රමුඛව පිහිටුවා ගත් ජාතික ජන බලවේගය හරහා මෙවර ජනාධිපති අපේක්ෂකයකු ඉදිරිපත් කර තිබෙන අතර එම අපේක්ෂකයා ජනතා විමුක්ති පෙරමුණේ නායකයා වීමද විශේෂ සිදුවීමකි. එම පක්ෂය හා සම්බන්ධ ජනාධිපතිවරණ ක්‍රියාදාමය මෙන්ම පවත්නා වත්මන් දේශපාලන ක්‍රියාන්විතයන් ගැන අද සිළුමිණ හා අදහස් දක්වන්නේ ජනතා විමුක්ති පෙරමුණේ ප්‍රධාන ලේකම් ටිල්වින් සිල්වා මහතාය.
ඔබ පක්ෂයේ අන්ජාන් උම්මා ඇතුළු පිරිසක් මේ වන විට පක්ෂය හැර ගිහින් සජිත් ප්‍රේමදාස මහතාට සහාය පළ කරන බවට ප්‍රකාශ කර තිබෙනවා. මොකද වෙලා තියෙන්නෙ?
ඒ අය අපේ පක්ෂයේ නෙමෙයි. මට මතක විදිහට අන්ජාන් උම්මා ඇතුළු පිරිස මේ පක්ෂයෙන් ගියේ 2008 කාලයේ වගේ, ඒ කියන්නෙ අවුරුදු 11කට විතර කලින්. ඒ අය විමල් වීරවංශගේ පක්ෂයට ගියා. පසුව එක්සත් ජාතික පක්ෂයට සහාය පළ කළා. ඒ විදිහට රවුම් ගග ගහ ඉන්න අය. ඒ අය අපේ පක්ෂයට අයත් අය නෙමේ. ඒක නිසා ඒ කතාව අපට අදාළ නැහැ.
එහෙත් ඒ අයත් එක්කම අනුරාධපුරයේ ඇතුළු තවත් ප්‍රදේශ කිහිපයක ජවිපෙ හිටපු පළාත් සභා මන්ත්‍රීවරුන් ඇතුළු දේශපාලන නායකයින් කිහිප දෙනෙක් පක්ෂයෙන් ගියා නේද? ඒ සියලු දෙනාම පක්ෂයේ අය නොවන බවද ඔබ කියන්නේ.
පැහැදිලිවම, ඒ කිසිවෙක් ජනතා විමුක්ති පෙරමුණට සම්බන්ධ අද අය නෙමෙයි. විශේෂයෙන්ම අන්ජාන් උම්මා මේ වන විට තුන් හතර වතාවක්ම එක්සත් ජාතික පක්ෂයේ වේදිකාවලට නඟින්න ඇති. සාමාන්‍යයෙන් ඡන්දයක් ආවට පස්සේ පරණ අය ඉස්සරහට ගෙනැත් යළි යළිත් විකුණනවා. ඒකෙන් පේන්නෙ ඒ දේශපාලන පක්ෂවල බංකොළොත් භාවයයි.
නමුත් ජනතා විමුක්ති පෙරමුණේ අය තම පක්ෂයට ආ විට විශේෂයෙන් හඳුන්වා දිය යුතුයි කියා ඔබ හිතනවාද?
සමාජයේ පොදු පිළිගැනීමක් ජනතා විමුක්ති පෙරමුණට තිබෙනවා. ඒ පිළිගැනීම හරහා තමයි මේ පිරිස් පරණ භාණ්ඩ අලුත් කරන්නේ. ඒක නිසා තමයි අවුරුදු 10කට 12කට පෙර අපේ පක්ෂයෙන් ඉවත් වුණු අය, ඉවත් කරපු අය ගෙනැවිත් පෙන්නුම් කරන්නේ. හැම ඡන්ද කාලෙකදිම ඒ වගේ ක්‍රියාවක් සිදු කරල අපට මඩ ගැසීම් කරනවා. ඒ හරහා හරි තමන්ට වාසියක් ගන්නයි බලන්නෙ. දේශපාලන වශයෙන් නන්නත්තාර වෙලා කරන්න දෙයක් නැති වුණාට පස්සෙ කරන ඒවා තමයි ඒ.
ජනාධිපතිවරණයට සහාය දෙන්න නම් ඉල්ලීම් 13ක් ඉදිරිපත් කරන්න උතුරේ දේශපාලන පක්ෂ හා සංවිධාන 5ක් කටයුතු කර තිබෙනවා. මේ තත්ත්වය දකින්නේ කෙසේද?
ඒ ඉල්ලීම් ජාතික සමඟියට බාධාවක්. ඒ ඉල්ලීම්වලින් කිහිපයක් හැරෙන්න අනෙක් ඒවා කිසිදු අපේක්ෂකයකුට කරන්න පුළුවන් ඒවා නෙමෙයි. ඒක නිසා එය අපි ප්‍රතික්ෂේප කරනවා. ජාතික සමඟියට මුල් තැනක් ලබා දිය යුතු අවස්ථාවක එයට බාධා කරමින් සිදුකරන මේ ජාතිවාදී ක්‍රියාවන් නිසා අසමඟිය පවා පැතිරෙන්න පුළුවන්. ඒ යෝජනාවලට බහුතර දෙමළ ජාතික ජනතාව පවා එකඟ වන්නේ නැහැ. එයින් කිහිපයක් හැරෙන්න සෙසු යෝජනා ප්‍රායෝගිකව ක්‍රියාත්මක කරන්න බැහැ.
මොනවද ඉටු කළ හැකි යෝජනා ලෙස ඔබ දකින්නේ?
මානව හිමිකම් ප්‍රශ්න සම්බන්ධව තිබුණු කරුණු කිහිපයක් හා ඉඩම් ආපසු ලබා දීම වැනි කරුණු සම්බන්ධව එකඟ වන්නට පුළුවන්. විශේෂයෙන්ම ඉඩම් ආපසු ලබා දීම වැනි දේ ඉටු කළ යුතුම කාර්යයන්. දෙමළ ජනතාව පවා අපහසුතාවට පත් කරන අන්තවාදී ඉල්ලීම් තබා වැඩි වශටෙන් එහි අඩංගු වන්නේ. විශේෂයෙන්ම උතුරු නැඟෙනහිර ඒකාබද්ධ කිරීම වැනි යෝජනාවන් අපි පරාජයට පත් කරන ලද ඉල්ලීම් බව පෙන්වා දිය යුතුයි.
උතුරේ ජනතාව ජාතික ජන බලවේගයට එක් කර ගැනීමට ඔබ පක්ෂය හෝ ජාතික ජනබලවේගය ගෙන ඇති ක්‍රියා මාර්ග මොනවාද?
අපි උතුරේ ජනතාව හා සමඟ කතා කරමින් ජාතික සමඟිය සැකසීමේ වැඩ පිළිවෙළක් ආරම්භ කර තිබෙන්නේ. ඒ අදහස් පිළිගත් විද්වත් හා දේශපාලන කණ්ඩායම් උතුරේ ඉන්නවා. ජාතික හැඟීමකින් ක්‍රියාකරන ඒ අයගේ අදහස් හා එක්ව අප කටයුතු කරනවා.
ජාතිවාදීන් හා එක්ව අප කටයුතු කරන්නෙ නැහැ, දකුණේ අන්තවාදීන් හා එක්න අප කටයුතු නොකරන්නා සේම උතුරේ අන්තවාදීන් හා එක්ව අප කටයුතු කරන්නේ නැහැ. මුස්ලිම් හෝ වේවා, දෙමළ හෝ වේවා, සිංහල හෝ වේවා ජාතිවාදය අන්තවාදය කෝකත් එකයි. ඒ හැම එකකින්ම කෙරෙන්නේ අසමඟිය මෙන්ම ජාතීන් අතර ගැටලු නිර්මාණය කිරීමයි. ඒ නිසා අපි සියලු දෙනාගේම සම අයිතිය පිළිගන්නා කණ්ඩායම් සමඟ පමණයි කටයුතු කරන්නේ.
ඔබ එසේ කිව්වත් දකුණට වඩා උතුරේ තත්ත්වය වෙනස්, අන්තවාදීන්ට ජාතිවාදීන්ට වැඩි ඉඩක් එහි තිබෙනවා, දෙමළ දේශපාලනඥයින්ට යම් පිළිගැනීමක් ජනතාව අතර තිබෙනවා. එවන් තත්ත්වයක් මත ජාතික ජන බලවේගය කුමනාකාරයෙන්ද කටයුතු කරන්නේ?
අපි උතුරේ දේශපාලන කටයුතු අරඹා වසර 5ක් 6ක් පමණ වෙනවා. අපේ දේශපාලන සාමාජිකයින් උතුරේ ඉන්නවා. අපේ මතය පිළිගත් විද්වත් වෘත්තිකයින් එහි ඉන්නවා. ඒ ක්‍රියාකාරිකයින් හරහා අප එහි කටයුතු කරනවා. අපි මැයි දින සමරු කිහිපයක්ම උතුරේ තිබ්බා, හොඳ ජනතා ප්‍රතිචාරයක් ඒ සඳහා ලැබුණා.
අනුර කුමාර දිසානායක මහතා රැස්වීම් සම්මන්ත්‍රණ කිහිපයක්ම උතුරේ පැවැත්වූවා. ඒ සඳහාත් හොඳ ප්‍රතිචාර ලැබුණා. උතුරේ ජනතාවත් වෙනසක් බලාපොරොත්තුවෙන් ඉන්නේ. ඔවුන්ගේ අදහස වී ඇත්තේ සාම්ප්‍රදායික පක්ෂ වෙත යෑම වෙනුවට වෙනසක් කරා ගමන් කිරීමයි.
ඒත් විග්නේෂ්වරන් මහතා පැහැදිලිවම කියා තිබුණා කිසිදු සිංහල නායකයකුට ඡන්දය දීමෙන් දෙමළ ජනතාව වැළකිය යුතු බවට.
විග්නේෂ්වරන් කියන්නේ අන්තවාදී දේශපාලකයෙක්. ඔහුගේ ප්‍රකාශ ජනතාව සලකාවි යැයි සිතන්න බැහැ. ඔහු මහ ඇමැතිකම දැරූ වසර 5ක කාලය ඉතාම අසාර්ථක වුණා.
උතුරේ දෙමළ දේශපාලන කණ්ඩායම් අතර පවා ඔහුට පිළිගැනීමක් නැහැ. විශේෂයෙන් දෙමළ ජාතික සන්ධානයේ පවා ඔහුට පිළිගැනීමක් නැහැ. එම නිසා ඔහු වැනි අන්තවාදී, ජාතිවාදී දේශපාලකයකු කියන කිසි දෙයක් අප පිළිගත යුතු නැහැ. ඒ වගේම ඒ ගැන කලබල විය යුතු නැහැ.
ඒත් ඔහුගේ ඒ ප්‍රකාශ සුළු කොට තකන්න බැහැ, ජාතික ජන බලවේගය හරහා ස්වාධීන ජනමාධ්‍ය කොමිසමක් පත් කරන බව විජිත හේරත් මහතා පැවසුවා. අවම වශයෙන් මේ අවස්ථාවේ ජාතිවාදය පතුරවන කතා මාධ්‍ය හරහා ප්‍රචාරයට යම් වාරණයක් ලබා ගැනීමේ හෝ ක්‍රමවේදයක් ඔබ පක්ෂයේ අවධානය යොමු වී නැත්ද?
ජනමාධ්‍ය හරහා පමණක් ඒ කාර්යය කරන්න බැහැ. අන්තවාදී ප්‍රකාශ නිකුත් කරන අය සම්බන්ධවයි පළමුව කටයුතු කළ යුත්තේ. එවන් අයට විරුද්ධව නීතිමය කටයුතු කළ හැකි පැහැදිලි ක්‍රමවේදයක් තිබිය යුතුයි. දඬුවම් ලබා දිය හැකි ක්‍රමයක් තිබිය යුතුයි. එය පළමුව ක්‍රියාත්මක විය යුතු අතර මාධ්‍ය මඟින් පළ කිරීම වැළැක්වීම කෙරෙහි අවධානය යොමු කළ යුත්තේ දෙවනුවයි. ලෝකයේ බොහෝ රටවල මාධ්‍යයට නීති වාරණ පනවා නැහැ. මාධ්‍යවේදීන්ගේ අවබෝධය අත් දැකීම හා ස්වයං විනය අනුව තමයි ඔවුන් කටයුතු කරන්නේ. ඒ අයුරින් සමාජයට අවැඩදායක, ජාතීන් අතර අසමඟිය පතුරවන කතා ප්‍රචාරයට වැට බඳින්න ඔවුන් විසින් ස්වයං අවබෝධයකින් සදාචාරමය ලෙසින් කටයුතු කිරීමයි වැදගත් වන්නේ.
එහෙත් අද අපේ රටේ එවැන්නක් දක්නට නැහැ.
ඔබ එයට හේතු ලෙස දකින්නේ මොනවාද?
රාජ්‍ය මාධ්‍යයට රජයේ ක්‍රමෝපායන්නට ඉහළින් යන්න බැහැ. ඒ වගේම පෞද්ගලික මාධ්‍යයට හිමිකරුවන්ගේ බලපෑම් එල්ල වනවා. ඇතැම් පෞද්ගලික මාධ්‍ය හිමිකරුවන් දේශපාලනඥයින්, එවන් තත්ත්වයක් මත අපට ස්වාධීන ජනමාධ්‍යක් බලාපොරොත්තු වන්න බැහැ. ඒ නිසා ස්වාධීන ජනමාධ්‍ය කොමිසමක් හරහාම මේ තත්ත්වයට විසඳුමක් ලබා දිය යුතු වෙනවා.
අනුර කුමාර දිසානායක මහතා පසුගියදා ප්‍රකාශ කළා ශ්‍රී ලංකාව නීතියක් විනයක් නැති රටක් බව, ජාතික ජනබලවේගය හරහා ඒ තත්ත්වය වළක්වාලන්න ගනු ලබන පියවර කුමක්ද?
අපේ රටේ විනයක් නැත්තේ දේශපාලකයින් ඇඟිලි ගහන නිසයි, ඒ නිසා අධිකරණ කොමිසම නිසි බල සහිතව ක්‍රියාත්මක කළ යුතු වෙනවා. බලය ඇති අය නීතිය තමන්ගේ ක්‍රියාකාරකම් සදහා යොදා ගැනීම වැළැක්විය යුතුයි. අපේ පාලන ක්‍රමවේදයක් තුළ නීතියට ඇඟිලි ගැසීම් නවත්වනවා. නීතියයි විනයයි දෙකම රකින්න පුළුවන් එවන් ක්‍රියාදාමයන් හරහා පමණයි.
ලාල්කාන්ත මහතා අනුර කුමාර මහතාගේ රැස්වීමකදී ගෝඨාභය රාජපක්ෂ මහතා දැඩි දෝෂ දර්ශනයට ලක් කළා. ඔබ පක්ෂයත් අනන්‍යන්ට දෝෂාරෝපණය කිරීම් ආරම්භ කර තිබෙනවාද?
අපේ පක්ෂයේ ප්‍රතිපත්ති සංකල්ප පිළිබඳව ජනතාවට අදහස් දක්වනවා සේම අනෙක් අයගේ වැරැදි, දූෂණ, අපරාධ හෙළි කිරීමත් අප විසින් කළ යුතුයි. ඒවා ජනතාවට හෙළි කළ යුතු වෙනවා. ඇතැම් අය කියනවා ‘අපි නම් කාටවත් මඩ ගහන්නේ නැහැ‘ කියා. මඩ ගැසීම එකක්, සත්‍යය හෙළි කිරීම තව එකක්. අපි හෙළි කරන කරුණු අසත්‍ය නම් නඩු දාන්න පුළුවන්.
නමුත් බොහෝ අය කියන කතාවක් තමයි ඔබ පක්ෂය ආණ්ඩුවට කඩේ යනවා නැත්නම් යාප්පුවෙන් ආණ්ඩුවත් එක්ක කටයුතු කරනවා කියලා...
ඔය කතාව එක පැත්තකින් කියන එකක් නෙමෙයි. දෙපැත්තෙන්ම කියනවා. පසුගිය දිනයක එක්සත් ජාතික පක්ෂයට හිතවත් මහාචාර්යවරයකු පවසා තිබුණා අපිට ඡන්දය දෙන එක ගෝඨාභයට ඡන්දය දෙනවා හා සමානයි කියලා, මහින්ද රාජපක්ෂ මහතාට ගෝඨාභය රාජපක්ෂ මහතාට හිතවත් අය කියනවා අපි එජාපයට සහයෝගය දෙනවා කියලා, තවත් අය කියනවා අපි ඡන්ද කඩනවා කියලා, මේ මත දෙක තුන අතර ජනමාධ්‍යත් තමන්ට අවශ්‍ය විදිහට මාධ්‍ය හසුරවනවා ඒ අදහස් අරගෙන. ඇත්ත ගත්තොත් මේ සියල්ලටම වඩා පරප්සරයි. ඇත්තටම මේ ප්‍රධාන පක්ෂ දෙක තමයි තම තමන්ගේ කටයුතු ඒකාබද්ධව කර ගන්නේ. එහෙම කරගෙන අනෙක් අයට ලේබල් අලවනවා.
උදාහරණයක් හැටියට එස්. බී. දිසානායක අරගෙන බලන්න. එදා එක්සත් ජාතික පක්ෂයේ අද ශ්‍රී ලංකා නිදහස් පක්ෂයේ, එක්සත් ජාතික පක්ෂයේ හිටපු අද අය මහින්ද රාජපක්ෂ ළග.
ගෝඨාභයට අපේක්ෂකයා වෙන්න රනිල් තමයි උදවු කළේ. එයා හිතුව එයාට පහසු වෙයි කියල ගෝඨාභය ආවොත් ජනාධිපතිවරණය දිනන එක. ඒත් අන්තිමට එයාට අපේක්ෂකයා ලෙස ඉල්ලන්නවත් බැරි වුණා.
අනුර කුමාර දිසානායක මහතා කිව්වා ජාතික ජන බලවේගය යටතේ 2020 ජනවාරි මාසයට පෙර කෙසේ හෝ හොරා ගත් මුදල් ලබා දෙන ලෙස දේශපාලක හොරුන්ට දැනුම් දෙනවා කියලා, ඔබ හිතනවද එහෙම ගෙනැත් දෙයි කියලා,
අනවසර ගිනි අවි වැටලීම් කරන්න කලින් පොලිසිය වුණත් සහන කාලයක් දෙනවා. එසේ තියෙන ඒවා ගෙනැත් බාර දෙන්න කියලා,
ඒ වගේ ජාතික ජන බලවේගයත් පවසනවා එසේ හොරා ගත් මහජන මුදල් ආපසු ලබා දෙන්න කියලා. මොකද අපි දන්නවා එක් එක්කෙනා හොරා ගත් දේපළ මොනවද? වටිනාකම් මොනවද? කොයි කාලෙද මේ හොරකම් කෙළේ, මේ සේරම විස්තර.
ඒක නිසා අපට ආයිත් අමුතුවෙන් ඒ ගැන සොයා බලල ගන්න දෙයක් නැහැ. අඩුම ගානේ උසාවි ගිහින් නඩු හබවලට පැටලිලා හිරේ යනවට වඩා ගොඩින් බෙර ගන්න එක එයාලට හොඳයිනෙ. කොහොමත් අපි පක්ෂයක් ලෙසත් ජාතික ජන බලවේගය ලෙසත් කියන දේ කරන කට්ටියක්. ඒක නිසා අපි හිතනවා එහෙම ගෙනැත් බාර දීල පොදු සමාවක් ගනියි කියලා, එහෙම නොකළොත් අවශ්‍ය නීතිමය පියවර ගන්න අපි පසුබට වෙන්නේ නැහැ. ඒ විදිහට මහජන මුදල් අරගෙන අපි ජනතා සේවයට යොදවනවා. ඒ විතරක් නෙමෙයි වැරැදිකරුවන්ට උපරිම දඬුවම් අධිකරණය හරහා ලබා දෙනවා. අමතක නොකළ යුතු කරුණක් තමයි හොරා කෑ දේපළ වත්කම් පිළිබඳ සේරම විස්තර අප සතු වන බව.
ඒත් ප්‍රධාන පක්ෂ දෙක හා සංසන්දනය කරන විට ජාතික ජනබලවේගය එහෙමත් නැත්නම් ජනතා විමුක්ති පෙරමුණට තවමත් හිමිව තිබෙන්නේ තුන්වන ස්ථානය නේද?
දේශපාලන ගමන් මාර්ගයක ස්ථාන තෝරා ගැනීම 1,2,3 වශයෙන් තෝරන්න බැහැ. අවුරුදු 71ක් තිස්සේ නොලැබුණු විකල්ප ස්ථානය ලබා දෙන්න තමයි ජාතික ජන බලවේගය කටයුතු කරන්නේ. ඒ වෙනස සිදු වීමේදී 1 ස්ථානය හෝ 2 ස්ථානයද යන්න වැඩක් නැහැ. 4 හෝ 5 ස්ථානවල ඉන්න අය මුලට ආපු අවස්ථා ඕන තරම් තියෙනවා. අපි ජනතා සේවයට කැපවීමයි කළ යුත්තේ.
ඒත් ප්‍රධාන පක්ෂ දෙකේ බලකණු හුඟක් ශක්තිමත් ඔබ හිතනවද ජාතික ජන බලවේගයට පුළුවන් කියලා ඒ බලකණු හොල්ලන්න.
2015 අවුරුද්දේ මහින්ද රාජපක්ෂ මහතා සිංහාසනාරූඪව හිටියෙ. ඒ තැනැත්තා එතැනින් බස්සලා මැදමුලන ජනේලයක එල්ලන්න පුළුවන් වෙච්ච අපට ඒක මහ දෙයක් නෙමෙයි.
ප්‍රධාන පක්ෂ දෙකම අද කියනවා ඉතිහාසයේ කිසිදාක කතා නොවිච්ච දෙවන මනාපයක් ගැන ඒකෙන් ඒ පක්ෂ දෙකම අද පිළිගන්නවා ජාතික ජන බලවේගයේ ඇති බලය කුමක්ද කියා. කිසිදු පක්ෂයකට 50%කට වඩා ගන්න බැරි බවට සමාජ විචාරකයින් පවා අද මත පළ කර තිබෙනවා. අපි අනිවාර්යයෙන්ම මේ බලකණු හොල්ලනවා.
යම් ආකාරයකින් ජනාධිපතිවරණය ජය ගන්න බැරි වු‍ණොත් එතැනින් ඔබ්බට යන ඉලක්කය කුමක්ද?
ජාතික ජන බලවේගය ජනාධිපතිවරණය ඉලක්ක කරගත් ව්‍යාපාරයක් නොවන බව අප පැහැදිලිවම ප්‍රකාශ කර තිබෙනවා. ජනතා ව්‍යාපාරයක් ලෙසින් අප කටයුතු කරන්නේ ජනතාවට වග කියන රජයක් බිහි කරන්නයි. අපේ සටන ඉදිරියටම යනවා. නමුත් ඒ සඳහා ජනාධිපතිවරණය විශාල පිටිවහලක් වන බවට අපට විශ්වාසයි.
මත්තල ගුවන් තොටුපොළ, හම්බන්තොට වරාය, සූරියවැව ක්‍රීඩාංගණය අපට විශාල ගැටලුවක් බව ආණ්ඩුව පවසනවා.
ඒ සංවර්ධන ව්‍යාපෘති කිසිදු සැලසුමකින් තොරව ඉදි කළ බව ඇත්ත. නමුත් අපට ගොඩ ගන්න පුළුවන්. එහෙත් මේ ආණ්ඩුවට එහෙම සංවර්ධනයක් ගැන හැඟීමක් නැහැ. රටේ තියෙන සම්පත් විකුණගෙන කන එකයි මේ ආණ්ඩුවේ ප්‍රතිපත්තිය වන්නේ. හම්බන්තොට වරාය ගැන දැන් කතා කරල වැඩක් නැහැ. ඒක චීනෙට බදු දීල ඉවරයි අවුරුදු 99කට. මත්තල ගුවන් තොටුපොළ සංවර්ධනය කරන්න පුළුවන්. ඒ සඳහා සංචාරක කර්මාන්තය හරහා අපට කටයුතු කරන්න පුළුවන්. විශේෂයෙන්ම යාල වැනි සංචාරක කලාප හරහා මේ කටයුතු කළ හැකියි.
එහෙත් ත්‍රිකුණාමලයේ තෙල් ටැංකි විකුණන්න හදන, කොළඹ වරායේ නැගෙනහිර ජැටිය විකුණන මේ ආණ්ඩුවට සංවර්ධන සැලැස්මක් නැහැ. ඒකට එකම විකල්පය ජාතික ජන බලවේගය පමණයි.
