පුරුෂයාට සාපේක්ෂව කාන්තාව මෘදු ගතිගුණවලින් සහ සියුමැලි ළඳ බොළඳ භාවයෙන් යුක්ත ය. එහෙත් වර්තමානයේ දී කාන්තාවන්, පුරුෂයින් සිදු කරන කාර්යයභාර්යයන් ඒ අයුරින්ම ඉටු කිරීමට දක්ෂ වී තිබේ. ඇතැම් අවස්ථාවලදී කාන්තාවන් පුරුෂයින් අභිබවා සමාජ ගෞරවයට සහ ප්‍රසංශාවන්ට පාත්‍ර වී ඇත.ඉන්දියාවේ මහාරාෂ්ටයේ ගොවි පවුලක සහෝදර සහෝදරියන් 04 දෙනෙකුගෙන් යුක්ත පවුලක උපත ලැබු පනස් දෙහැවිරිදි සුරේකා යාදව් ඉන්දියාවේ පළමුවැනි දුම්රිය රියදුරුවරිය ලෙස ඉතිහාස ගත වී ඇත්තේ තවත් බෝහෝ කාන්තාවන්හට සිය ශක්තිය පෙන්වමිනි.
"මම විතරයි එදා විභාගයට ලියපු එකම ගැහැණු ළමයා, ඒ කාලේ කිසිම ගැහැණු ළමයෙක් දුම්රිය රියදුරුවරියක් හෝ දුම්රිය ස්ථානයක සේවය කරන්නට කැමැත්තක් දැක්වුයේ නැහැ. ඒත් මම මගේ ප්‍රථම පියවර තැබුවා. ඒකෙන් මට අවස්ථාවක් හම්බ වුණා මගේ රටේ ජනතාවට විශාල කාර්යයභාර්යක් කරන්න පුළුවන් වුණා. "
අනෙක් කාන්තාවන් නොකරන කර්තව්‍යක් සිදු කිරීමට ඇය කිසි විටකවත් පැකිලුණේ නැත. ඒ මන්ද යත් ඇගේ ආත්මශක්තිය අනෙක් කාන්තාවන්ට සාපේක්ෂව වැඩි වීම ය. පාසල් සමයේ දී සුරේඛා ක්‍රීඩා සහ සංවිධානාත්මක කටයුතුවලට දැඩි උනන්දුවක් දැක්වුවා ය. උසස් අධ්‍යාපනයෙන් පසුව ගුරුවරියක වීමේ බලාපොරොත්තුව ඇය සතුව තිබුණ ද පසුව ඇගේ අසාමාන්‍ය හැකියාවන් හේතුවෙන් ඉලෙක්ට්‍රොනික් විද්‍යාව හැදෑරීමට යොමු විය.
ඉලෙක්ට්‍රොනික් විද්‍යාව පිළිබඳව ඩිප්ලෝමාව හිමි කර ගැනීමෙන් පසු තාක්ෂණික සිසුවියක ලෙස තම වෘත්තීය සුදුසුකම සම්පුර්ණ කර ගත්තා ය. 1987 වර්ෂයේ දී දුම්රිය රියදුරු දෙපාර්තමේන්තු රැකියා ලබා ගැනීමේ ප්‍රවේශ විභාගයට පිළිතුරු ලීවා ය. එයින් සමත් වු ඇය ඉන්දියා රේල්වේස්හි ප්‍රාදේශීය මට්ටමේ සහකාර රියදුරුවරියක ලෙස තම වෘත්තීය ජීවිතය ඇරඹුවා ය.
2011 වර්ෂයේ දී ඉන්දීය දුම්රිය දෙපාර්තමේන්තුවේ කාන්තා රියදුරුවරියන් පනස් දෙනෙකුට වැඩි ප්‍රමාණයක් පුහුණු කිරීමට සුරේඛාට අවස්ථාව හිමි විය. තමන් ආරම්භ කළ පියවර ඔස්සේ තවත් කාන්තාවන් බොහෝදෙනකු දෙනා පියවර තබන විට සුරේඛා කිසිදු ගුරු මුෂ්ටියක් නොමැතිව ඔවුන්ට අවශ්‍ය මග පෙන්වීම ලබා දුන්නා ය.
L- 50 දුම්රියෙහි එන්ජිම ක්‍රියාකාරීභාවය පිළිබඳව සහ සිග්නල් හසුරුවන ආකාරය පිළිබඳව බෙහෝ දෑ ඉගෙන ගන්න පුළුවන් වුණා. මේ හැමදේම ප්‍රායෝගිකව සිදු කර මනසෙහි ධාරණය කර ගැනීමට ලැබීම නිසා වෘත්තීයක් වශයෙන් යහපත් වෘත්තියක් ලෙස මෙය හඳුන්වන්න පුළුවන්. වර්තමානයේ දී නිවෙස්වලට වී නිකරුණේ කාලය අපතේ දමන කාන්තාවන් මෙන් නොව ඇය තමන් උගත් දෑ පිළිබඳව ප්‍රායෝගිකව අත්හදා බැලීමට ප්‍රියතාවක් දැක්වුවා ය. නිරන්තරයෙන්ම යන්ත්‍රසුත්‍ර භාවිතයෙන් සිදු කළ හැකි වන්නේ කුමක් ද? යන්න පිළිබඳව අවධාණයෙන් සිටීමට ඇය උත්සුක වුවා ය. .රාජකාරිය අතරතුරේදීත් සුරේඛා තමන් සතු දැනුම ප්‍රායෝගිකව නිසි අයුරින් භාවිත කිරීමට උනන්දු වුයේ ඉන්දීයාවේ කාන්තාවන්ට සිදු කළ හැකි වෘත්තීයක් හඳුන්වා දීමේ කාර්යයට පෙරමුණ ගනිමින් කාන්තාවක සතු යුතුකම ඉටු කිරීමට ය.
1990 වර්ෂයේ දී සුරේකා රජයේ පොලිස් පරීක්ෂකවරයෙකු වන ශංකර් යාදව් සමඟ විවාහ විය. ඔවුන්ගේ පුතුන් දෙදෙනා වන අජින්ත සහ අජිතේෂ් ඉංජිනේරුවරුන් වීම සඳහා අධ්‍යාපනය ලබමින් සිටිති. තමන්ගේ රාජකාරීය කොතරම් බෑරෑරුම්සහගත වුවත් සුරේකා තමන්ගේ පෞද්ගලික ජීවිතය සහ රාජකාරී ජීවිතය පටළවා ගත්තේ නැත. 2010 වර්ෂයේ Western Gltat railway line නමැති දැවැන්ත දුම්රිය භාරගත් ඇය කැපවීමෙන් යුක්තව තම රාජකාරී ඉටු කිරීමට කටයුතු කළා ය. ඉන් අනතුරුව 2011 වර්ෂයේ මැයි මාසයේ දී අධිවේගී දුම්රිය රියදුරුවරියක ලෙස රාජකාරීය භාරගත් ඇය DTC ( Driver's Training Centre) හි ජේෂ්ඨ උපදේශිකාවක් ලෙස ද වෘත්තියෙහි නියලුණා ය.
2011 වර්ෂයේ මාර්තු 08 වන දින කාන්තා දිනයේ දී ආසියාවේ ප්‍රථම දුම්රිය රියදුරුවරිය ලෙස සම්මානයට පාත්‍ර විය. තවත් පුද්ගලයෙකු සිදු කරන නිසා යම් කාර්යයක් සිදු නොකර ස්වකීය අධිෂ්ඨානයෙන් යුක්තව අභීතව නැගී සිටිමින් කාර්යයභාර්යයන් සිදු කිරීම වඩාත් අගනා දෙයක් බව සුරේකා යාදව් මුළු ලොවටම එදින ප්‍රකාශ කළා ය.
"ඔබ සැමට ප්‍රථම වරට ගුරුවරියක්, ලිපිකාරිනියක්, හෙදියක් , සෙබලියක් , සහ ගුවන් නියමුවරියක් වීමට පුළුවන්. කාන්තාවන් සැම විටම හිතන්න ඕනේ අපිට හිතට ගත්තොතින් කරන්න බැරි දෙයක් නෑ කියලයි. කාන්තාවකගේ සහ පුරුෂයෙකුගේ කායික මානසික අවශ්‍යතාවන් විවිධ වෙන්න පුළුවන්.ඒ වුනත් කාන්තාවකට සහ පුරුෂයෙකුට දැක්විය හැකි කුසලතා එක සමානයි කියලයි මම නම් කියන්නේ. " 2011වර්ෂයේ කාන්තා දිනය දවසේ ඇය මුළු මහත් සමාජයක් ඉදිරියේ ප්‍රතාපවත් කාන්තාවක බවට පත් වුයේ පුරුෂයින් දහස් ගණනක් ඉදිරියේ දී කීර්තිය සහ පැසසුම ලබමිනි.
අන්තර්ජාලය ඇසුරිණි
